कोंबड्या फेकाफाकी नंतर..भाजपकडून कार्यालयाचे शुद्धीकरण

जळगाव : शिवसेनेच्या (Shiv Sena) कार्यकर्त्यांनी भारतीय जनता पक्षाच्या कार्यालयावर (BJP Office) कोंबड्या फेकत आंदोलन (Movement) केले होते. श्रावण महिना सुरू असल्याने कार्यालय अपवित्र झाले, असा आरोप करीत भारतीय जनता पक्षाने शुक्रवारी (ता. २७) होमहवन करून पक्ष कार्यालयाचे शुद्धीकरण केले.

मुख्यमंत्री उद्धव ठाकरे यांच्या विरोधात अपशब्द वापरल्याने शिवसेनेने केंद्रीय मंत्री नारायण राणे यांच्या विरोधात राज्यभर आंदोलन केले. जळगावातली शिवसेनेतर्फे भारतीय जनता पक्षाच्या कार्यालयावर मोर्चा काढण्यात आला. यावेळी शिवसेनेतर्फे भाजप कार्यालयात कोंबड्या फेकण्यात आल्या होत्या. शिवसेनेने फेकलेल्या कोंबड्यामुळे भाजप कार्यालय अपवित्र झाले असा आरोप भाजपतर्फे करण्यात आला. यात भाजप महिला व आध्यात्मिक आघाडी यांनी म्हटले आहे की, आंदोलनाच्या नावाखाली हिंदूंचा पवित्र महिना श्रावणमास सुरू असताना या श्रावण महिन्यात कोंबडी फेकल्याने हे शुद्धीकरण करण्यात आल्याचे त्यांनी सांगितले.

यावेळी जिल्हाध्यक्ष दीपक सूर्यवंशी यांच्या हस्ते पूजा करण्यात आली. महिला आघाडीच्या प्रदेश उपाध्यक्षा उज्वला बेंडाळे, जिल्हा सरचिटणीस रेखा वर्मा, नीतू परदेशी, सरोज पाठक, रेखा कुलकर्णी, पूजा चौधरी, छाया सरस्वत, तृप्ती पाटील, ज्योती बर्गे, कोकिळा मोरे, शर्वरी मोरे, सरीता बारी, जिल्हा सरचिटणीस विशाल त्रिपाठी, महेश जोशी, नितीन इंगळे, दीपक साखरे, कार्यालय मंत्री प्रकाश पंडित, जिल्हा सह प्रसिद्धिप्रमुख धिरज वर्मा, आघाडी अध्यक्ष जयेश भावसार, युवा मोर्चा अध्यक्ष आनंद सपकाळे, मिलिंद चौधरी, राहुल वाघ, निलेश झोपे उपस्थित होते.