बुडणाऱ्या शेतकऱ्याचे दोघांनी थरारक पद्धतीने वाचविले प्राण

पाचोराः एखाद्या अपघाती घटनेत वाचलेले जीव पाहून काळ आला होता पण वेळ आली नव्हती या वाक्याचा वापर करण्यात येत असल्याचे आपण ऐकतो अथवा अनुभवतो देखील. असाच काहीसा प्रकार लासुरे (ता. पाचोरा) येथील अतुल देवरे या शेतकऱ्याबाबत (Farmer) घडला असून काळ आला होता पण तडवी व कोळी यांनी पुराच्या (drowning) पाण्यात उड्या मारल्या नसत्या तर बैलासह शेतकऱ्याला प्राण गमवावे लागले असते याची अनुभूती ग्रामस्थांना आली. तडवी व कोळी यांच्या धाडसाचे व प्रसंगावधानतेचे कौतुक होत आहे.

लासुरे ( ता. पाचोरा) येथील अतुल देवरे (वय 32) हे आपला चुलत भाऊ कपिल देवरे यांच्या मालकीची बैलगाडी घेऊन शेताकडे निघाले होते. गावा बाहेरच्या रस्त्यावर नदीकाठी नेहमीच्या ठिकाणी बैलांना पाणी पाजण्यासाठी ते बैलगाडीसह थांबले असता पाणी पीत असताना बैलांचे पाय अचानक घसरले व बैलगाडीसह अतुल देवरे हे पुराच्या पाण्यात पडले. हा प्रकार जवळच असलेल्या मस्तान तडवी ( लासुरे) व सागर कोळी (वरखेडी) यांनी बघितला व त्यांनी बैलांसह शेतकऱ्याचे प्राण वाचवण्यासाठी क्षणाचाही विलंब न करता पुराच्या पाण्यात उड्या घेतल्या.

बैलाचा मृत्यू

प्रथम पुराच्या पाण्यात वाहून जाणाऱ्या अतुल देवरे यांना त्यांनी बाहेर काढले नंतर एक बैल बाहेर काढला. दुसरा बैलही हाती लागला परंतु तो मृत झालेला होता. कपिल देवरे यांचा 40 हजाराचा बैल या घटनेत मृत झाला.

गेल्या आठवडाभरापासून नदीला पूर असल्याने बैलांना पाणी पाजण्याच्या नेहमीच्या ठिकाणी खड्डा पडला त्यामुळे दोघे बैल बैलगाडी सह पाण्यात पडले तडवी व कोळी या दोघांनी स्वतःच्या जीवावर उदार होऊन बैल व शेतकऱ्याला वाचवण्यासाठी पुराच्या पाण्यात मारलेली उडी अतुल देवरे व एका बैलाचा प्राण वाचविण्यात यशस्वी झाली. या दोघांच्या धाडसाचे कौतुक होत आहे .पोलीस पाटील संजय पाटील, तलाठी रूपाली रायगडे, पशुवैद्यक अधिकारी महाजन यांनी घटनास्थळी भेट दिली मृत बैलाचे शवविच्छेदन केले. या घटनेमुळे काळ आला होता पण तडवी व कोळी यांनी उड्या मारल्या नसत्या तर. . . याच विषयाची भीतीदायी व थरकाप उडविणारी चर्चा लासुरे व वरखेडी गावात रंगली आहे.