Municipal Corporation News : आयुक्त नियुक्तीची सुनावणी पुढे ढकलली

जळगाव : महापालिका आयुक्तपदी नियुक्तीबाबत ‘मॅट’मध्ये सुरू असलेली सुनावणी पुन्हा एकदा पुढे ढकलण्यात आली आहे. बुधवारी (ता. ११) सुनावणी होऊन निकाल लागण्याची शक्यता आहे.

महापालिका आयुक्तपदाचा पेच निर्माण झाला आहे. आयुक्त डॉ. विद्या गायकवाड यांची बदली करण्यात आली. त्यांचा पदभार परभणीचे आयुक्त देविदास पवार यांना देण्यात आला आहे. मात्र, डॉ. विद्या गायकवाड यांनी आपल्या बदलीला ‘मॅट’मध्ये आव्हान दिले असून, त्याची सुनावणी औरगांबाद येथे ‘मॅट’मध्ये सुरू आहे. (Municipal Corporation Updated Commissioner appointment hearing postponed Jalgaon News)

हेही वाचा : या महामार्गामुळं खरंच येईल 'समृद्धी'?

मॅटने आयुक्त गायकवाड यांच्या बदलीला स्थगिती दिली आहे. मात्र, पदभार त्यांच्याकडे न देता देविदास पवार यांच्याकडे दिला आहे. मात्र, त्यांनाही काही अटी शर्ती लावण्यात आल्या आहेत. आयुक्तपदी कोण राहणार, याचा निकाल ‘मॅट’मध्ये लागणार आहे.

मात्र, सध्या केवळ सुनावणीच्या तारखा पडत आहेत. आतापर्यंत पाच तारखा पडल्या आहेत. मंगळवारीही निकालाची शक्यता होती. मात्र, आयुक्त देविदास पवार यांचे वकील गैरहजर असल्यामुळे मंगळवारी कोणतेही कामकाज झाले नाही. आता ही सुनावणी बुधवारी (ता. ११) दुपारी तीननंतर होणार असल्याचे सांगण्यात आले असून, निकाल लागण्याची शक्यताही व्यक्त होत आहे.