चारित्र्याच्या संशयावरून पतीकडून पत्नीची हत्या

चोपडा : तालुक्यातील गोरगावले शिवारात राहत असलेल्या लिलाबाई बारेला हिच्या चारित्र्यावर संशय घेत पती ग्यानसिंग बारेला याने लिलाबाई हिला मारहाण करत लोखंडी पाते असलेल्या कोळपणीच्या साहाय्याने डाव्या कानावर गंभीर दुखापत केली. यात लिलाबाईचा जागीच मृत्यू झाला. ही घटना बुधवारी (ता. २७) रात्री नऊच्या सुमारास तालुक्यातील कठोरा शिवारातील डॉ संजय पाटील यांच्या शेतातील झोपडीत घडली. (Latest Marathi News)

ग्यानसिंग बारेला (मूळ रा. सोनखेडी, ता. वरला, जि. बडवाणी) हा गोरगावले शिवारात कुटुंबासह वास्तव्यास आहे. त्याने बुधवारी रात्री नऊच्या सुमारास पत्नी लिलाबाई हिला चारित्र्याच्या संशयावरून मारहाण केली. यातील फिर्यादी टेंम्ब्या मन्साराम बारेला व पत्नी लिलाबाई यांच्यातील चारित्र्याच्या संशयावरून लोखंडी पाते असलेल्या शेत कोळपणीच्या साह्याने लिलाबाईच्या कानावर वार करीत तिला गंभीर जखमी केले. यातून तिचा जागीच मृत्यू झाला. फिर्यादी टेम्ब्या बारेला याच्या फिर्यादीवरून ग्यानसिंग बारेला याच्याविरोधात चोपडा ग्रामीण पोलिस ठाण्यात गुन्हा दाखल करण्यात आला आहे.