No hawkers zone : नो-हॉकर्स झोन आजपासून कार्यान्वित; विक्रेत्यांना गाड्या न लावण्याचे आदेश

No hawkers zone : शहरातील रस्त्यावरील वाढते अतिक्रमण रोखण्यासाठी महासभेत पाच रस्त्यांवर ‘नो हॉकर्स झोन’ ठराव मंजूर केला होता.

शुक्रवार (ता. १४)पासून त्याची अमंलबजावणी होणार आहे. महापालिका अतिक्रमण विभागाने गुरुवारी (ता. १३) या रस्त्यांवरील सर्व विक्रेत्यांना गाड्या न लावण्याच्या सक्त सूचना दिल्या. (No hawkers zone operational from today jalgaon news)

शहरातील रस्त्यांवर मोठ्या प्रमाणात अतिक्रमण झाल्याच्या तक्रारी नगरसेवकांनी महासभेत केल्या होत्या. अतिकमण निर्मूलन विभाग कारवाई करीत नसल्याबाबत बहुतांश नगरसेवकांनी नाराजी व्यक्त केली होती.

अनेक वेळा तक्रारी करूनही कारवाई होत नसल्यामुळे शहरातील रेल्वेस्थानक परिसर, टॉवर चौक ते महाबळ, टॉवर चौक ते चित्रा चौक, चित्रा चौक ते न्यायलय चौक, न्यायालय चौक ते गणेश कॉलनी चौक या रस्त्यांवर ‘नो-हॉकर्स’ झोन करण्याचा प्रस्ताव नगरसेवकांनी दिला होता. हा प्रस्ताव एकमताने मंजूर करण्यात आला आहे.

हेही वाचा : Credit Card फसवणूक....काय घ्याल काळजी?

आजपासून अमंलबजावणी

महासभेत मंजूर केलेल्या ठरावाची अमंलबजावणी शुक्रवारपासून करण्यात येणार असल्याची माहिती उपायुक्त गणेश चाटे यांनी दिली. ज्या प्रभागातील रस्ते ‘नो-हॉकर्स झोन’ ठरविले आहेत. त्या ठिकाणच्या प्रभाग अधिकाऱ्यांना, तसेच अतिक्रमण निर्मूलन विभागाच्या अधिकाऱ्यांना कारवाई करण्याच्या सूचना श्री. चाटे यांनी दिल्या.

त्यानुसार गुरुवारी या रस्त्यांवरील विक्रेत्यांना शुक्रवारपासून रस्त्यांवर गाड्या न लावण्याच्या सूचना दिल्या आहेत. गाड्या लावल्यास कडक कारवाई करण्याचा इशाराही दिला. विभागप्रमुख उमाकांत नष्टे, संजय ठाकूर, साजिद अली, सतीश ठाकरे, संजय पाटील, नाना कोळी आदी या वेळी उपस्थित होते.