Jalgaon Crime News : गावात गेल्या काही दिवसांपासून गावठी दारुसह देशी, विदेशी दारु विना परवाना खुलेआम विकली जात आहे. दारुमुळे गावातील शांतता धोक्यात आली आहे.
गावातील मद्यपीने वृद्ध महिलेला मारहाण केल्याची घटना शुक्रवारी (ता. २४) दुपारी दीडच्या सुमारास घडली. (Open sale of liquor in andhari village jalgaon crime news)
याबाबत चाळीसगाव ग्रामीण पोलिस ठाण्यात मारहाण करणाऱ्या मद्यपीच्या विरोधात अदखलपात्र गुन्हा नोंदविण्यात आला आहे.
अंधारी गावासह परिसरात विविध ठिकाणी खुलेआम गावठी तसेच देशी, विदेशी दारु सर्रासपणे विकली जात आहे. येथील काही विक्रेत्यांनी स्थानिक पोलिसांशी आर्थिक हितसंबंध निर्माण केलेले असल्याने दारु विक्रेत्यांवर कुठलीही ठोस कारवाई होताना दिसत नाही. दारुमुळे अनेक गोरगरीबांचे संसार उद्ध्वस्त झाले आहेत.
गावातील तसेच तांड्यावरील अनेक तरुण दारुच्या आहारी गेले आहेत. दारु पिणारे स्वतःच्या घरात तसेच गावात भांडणे करतात. गावातील महिला दारु विक्रीमुळे अक्षरशः त्रस्त झाल्या आहेत. शुक्रवारी (ता. २४) दुपारी दीडच्या सुमारास शिवराम चव्हाण यांच्या घरासमोर गावातील तरुण संदीप चव्हाण हा दारुच्या नशेत आला व त्याने काहीही एक कारण नसताना शिवराम चव्हाण यांच्या मुलांना शिवीगाळ केली.
त्याचा जाब शिवराम चव्हाण यांच्या वृद्ध आई लाडकीबाई यांनी विचारला असता, त्याचा राग येऊन संदीप याने चापटाबुक्क्यांनी मारहाण केली व जीवे मारण्याची धमकी दिली. या घटनेची माहिती शिवराम चव्हाण यांना कळताच त्यांनी संदीपला याबाबत विचारल्यावर त्याने शिवराम चव्हाण यांनाही मारहाण केली.
याबाबत शिवराम चव्हाण यांंनी ग्रामीण पोलिसात दिलेल्या तक्रारीवरुन संदीप चव्हाणच्या विरोधात अदखलपात्र गुन्हा दाखल करण्यात आला आहे. दरम्यान, गावात खुलेआम विकल्या जाणाऱ्या दारुमुळेच असे वाद उद्भवत आहेत. गावातील कायदा आणि सुव्यवस्था धोक्यात आणणाऱ्या दारु विक्रेत्यांवर कारवाई करण्याची मागणी होत आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
