Jalgaon Crime News : कत्तलीसाठी जाणाऱ्या जनावरांची सुटका; चाळीसगाव पोलिसांची सतर्कता

Jalgaon Crime News : गोवंशाच्या जनावरांना कत्तलीसाठी नेणाऱ्या दोघांना हत्यारांसह शहर पोलिसांनी ताब्यात घेऊन त्यांच्याकडील जनावरांची कत्तल होण्यापासून मुक्तता केली.

याबाबत माहिती अशी, शहरातील हुडको कॉलनी व नागदरोड परिसरात मांसासाठी गोवंश जातीच्या जनावरांचा कत्तलीसाठी वापर होत असल्याची माहिती पोलिस निरीक्षक संदीप पाटील यांना मिळाली होती. त्यानुसार, रात्री गस्त घालणाऱ्या पथकाला त्यांनी सूचना दिल्या. (police Rescue animals going to slaughter jalgaon crime news)

शुक्रवारी (ता. ८) पहाटे चारच्या सुमारास उपनिरीक्षक योगेश माळी, हवालदार नितीन वाल्हे, महेंद्र पाटील, रवींद्र बच्छे, ज्ञानेश्वर गीते, ज्ञानेश्वर पाटोळे, पवन पाटील, भरत गोराळकर हे गस्त घालत असताना सदानंद हॉटेलजवळ दोघे जण दुचाकीवरून एका पिशवीत काही तरी घेऊन जाताना आढळले.

त्यांच्यावर संशय बळावल्यानंतर त्यांना पोलिसांनी थांबण्याचा इशारा केला असता, ते पळून जाऊ लागले. त्यांचा पोलिसांनी पाठलाग करुन त्यांना छाजेड ऑईल मिलजवळ पकडले असता, चौकशीत शेख अनिस शेख गफूर कुरेशी (४८, रा. उर्दु बालवाडीच्या मागे, मोहम्मदिया मशिदसमोर, इस्लामपुरा, चाळीसगाव) व मुस्ताक खान हारुन खान कसाई (४०, रा. अमोल बुट हाउसच्या बाजूला, रथगल्ली, कसाईवाडा, चाळीसगाव) अशी त्यांची नावे त्यांनी सांगितली.

हेही वाचा : Credit Card फसवणूक....काय घ्याल काळजी?

त्यांच्या पिशवीत लहान लाकडी दांड्याची लोखंडी धारदार कुऱ्हाड, दोन लोखंडी धारदार सुरे व धार लावण्याची गोलाकार लांब कानस मिळून आली. त्यांनी शेख अनिस शेख गफूर याच्या घराजवळच्या गोठ्यात गोवंश जातीची जनावराची कत्तल करण्यासाठी नेली जात असल्याची माहिती दिली.

त्यानुसार, पोलिस निरीक्षक संदीप पाटील, सहायक निरीक्षक सागर ढिकले यांच्यासह पथकाने त्या ठिकाणी छापा टाकून चार गोवंश जातीचे जनावरे व कत्तलीसाठीचा इतर मुद्देमाल असा एकूण ९३ हजारांचा मुद्देमाल जप्त केला.

त्यांच्या ताब्यातील चारही जनावरांची पोलिसांनी सुटका केली. याप्रकरणी दोघा संशयितांच्या विरोधात गुन्हा दाखल करण्यात आला आहे. तपास हवालदार महेंद्र पाटील करीत आहे.