भुसावळ : रस्त्यावरील खड्डा देतोय अपघाताला निमंत्रण

भुसावळ : शहरातील श्री छत्रपती शिवाजी महाराज व्यापारी संकुलाच्या जवळ रस्त्याचे डांबरीकरण करीत असताना रोलरच्या वजनाने गटारीवरील ढापा तुटल्याने त्या ठिकाणी खड्डा पडला आहे. या खड्ड्याची दोन वर्षांपासून दुरुस्ती होत नसल्याने येथे अनेक अपघात होत आहेत. बुधवारी (ता. १९) सकाळी महाविद्यालयीन विद्यार्थ्याचा अपघात झाला. मात्र सुदैवाने कुठलीही हानी झाली नाही. या ठिकाणी अपघातांची मालिका सुरूच असून, पालिका प्रशासन नागरिकांचा बळी जाण्याची वाट तर पाहत नाही ना, असा संतप्त सवाल रहिवाशी करीत आहे.

शहरातील शिवाजी महाराज व्यापारी संकुलामागील भागत हॉस्पिटलसमोर रस्त्याच्या मधोमध हा खड्डा पडला आहे. हॉस्पिटलमध्ये येणाऱ्या रुग्णांची मोठ्या प्रमाणात वर्दळ असते. तसेच बाजूलाच बाजारपेठ पोलिस ठाणे असल्याने येथे वर्दळ असते. मात्र अनेकदा खड्डा चुकविण्याच्या प्रयत्नात वाहनधारकाचा तोल जाऊन अपघाताच्या घटना वाढल्या आहेत.

या संदर्भात नागरिकांनी वारंवार तक्रार करूनही नगर परिषद प्रशासन जागे होत नाही. या खड्डयात कित्येक अपघात झाले आहेत. नगर परिषद प्रशासनाने अपघाताला थांबविण्यासाठी या खड्ड्याची दुरुस्ती करणे आवश्यक आहे. जेणेकरून अपघाताची घटना टाळता येईल. नगर परिषद प्रशासनाने दुर्लक्ष केल्यास एखादी घटना घडून जीव गमावा लागल्यास यास नगरपरिषद प्रशासन जबाबदार राहील, अशी मागणी परीसरतील नागरिकांकडून होत आहे.

थोडक्यात वाचले प्राण...

बुधवारी सकाळी अकराच्या सुमारास एक तरुण मोटारसायकलवरून जात असताना या खड्ड्यात पडल्याची घटना ताजी असून, आजूबाजूच्या व्यापाऱ्यांनी धाव घेऊन त्या मुलास खड्ड्यातून बाहेर काढले. काही वेळ त्याचा थरकाप होत होता. हा तरुण किरकोळ जखमी असून, हा खड्डा किती जणांचा जीव घेणार तसेच नगर परिषद प्रशासन याकडे लक्ष देणार का, असा प्रश्न निर्माण होत आहे.

वॉर्डात रस्ता काँक्रिटिकरण खड्ड्याकडे; मात्र दुर्लक्ष

प्रभाग दहामध्ये नुकतेच डांबरीकरण तसेच काँक्रिटीकरणचे काम करण्यात आले. मात्र दोन वर्षांपासून पडलेल्या या खड्ड्याकडे पालिकेचे साफ दुर्लक्ष झाले आहे. रस्त्याच्या मधोमध असल्याने अपघात होत असतात. काही दिवसांपूर्वी हा खड्डा निदर्शनास यावा याकरिता नागरिकांनी खड्ड्यात वृक्षारोपण केले होते.