Ayodhya Ram Mandir : अयोध्येत तीर्थक्षेत्र पूरम संतांचा मुक्काम

Jalgaon News : राम मंदिर सोहळ्यासाठी येणाऱ्या संत व त्यांच्या शिष्यांसाठी तीर्थक्षेत्र पूरम येथे व्यवस्था केली असून, तेथे एकूण सहा भाग करण्यात आले आहेत. प्रत्येक भागात एक लंगर असून, ठिकठिकाणी २४ तास चहा व टोस्ट दिला जात आहे.

तर थंडीपासून संरक्षणासाठी रस्त्यावर छत्रीसारखे ‘हीटर’ लावण्यात आले आहेत, अशी माहिती भारतीय जनता पक्षाचे जिल्हा सरचिटणीस परीक्षित बऱ्हाटे यांनी दिली. तीन दिवसांपासून ते अयोध्येत मुक्कामी आहेत. (Saints stay at Tirtha Kshetra Pooram for Ram Mandir celebrations in Ayodhya jalgaon news)

थेट अयोध्येतून ‘सकाळ’शी बोलताना बऱ्हाटे म्हणाले, की मी व भाजपचे शहर सरचिटणीस रमाशंकर दुबे असे दोघे जनार्दन महाराज यांच्याबरोबर आलो आहोत.

त्यांचे शिष्यही आहेत. गुजरातमधील मुख्य केंद्रातून ५० शिष्य आले आहेत. सर्व संत व शिष्य यांच्या मुक्कामासाठी मुख्य मंदिरापासून चार किलोमीटरवर तीर्थक्षेत्र पूरम वसविण्यात आले. तेथे पत्र्याच्या खोल्या तयार करण्यात आल्या आहेत.

यातच संत राहतात. येथे एकूण चार भाग असून, त्यांना महंत अवेद्दनाथजी महाराजनगर, महंत अभिरामदासनगर, मोरोपंत पिंगळेनगर, ओंकार भावेनगर अशी नावे दिली आहेत. प्रत्येक भागासाठी एक लंगर आहे. शिवाय, प्रत्येक ठिकाणी चहा व टोस्ट दिले जातात.

थंडीचा कडाका वाढला असल्याने रस्त्यावर काही ठिकाणी छत्रीसारखे ‘हीटर’ बसविण्यात आले आहेत. त्या छत्रीखालून गेल्यावर गरम वाटते.

आम्ही बुधवारी (ता. १७) मंदिर ट्रस्टच्या मुख्य कार्यालयाला भेट दिली. कार्यालयाच्या समोरच भारतातील विविध नद्यांचे जल मोठमोठ्या स्टीलच्या कलशात आणून ठेवले आहे.

"हनुमान गढीवर तसेच जुन्या मंदिरात जाऊन रामलल्लाचे दर्शन घेतले. नवीन मंदिर दुरून पाहता आले. अनेक ठिकाणी अजूनही कामे सुरू आहेत. अजून म्हणावी तशी गर्दी जाणवत नाही. जळगाव जिल्ह्यातून भक्तिकिशोर शास्त्री, संत गोपालचैतन्य बापू यांचे आगमन झाले आहे. वातावरण एकदम प्रसन्न व उत्साहपूर्ण आहे." - परीक्षित बऱ्हाटे, जिल्हा सरचिटणीस, भाजप