Jalgaon News : Toilet घोटाळा प्रकरणातील संशयित मंजुश्री पवार अटकेत

Jalgaon News : राज्यभर गाजलेल्या येथील ‘टॉयलेट’ घोटाळ्यातील संशयित मंजुश्री पवार यांना पोलिसांनी अटक केली आहे. तब्बल १३ महिन्यांनंतर त्या बुधवारी (ता. २१) येथील पोलिस ठाण्यात हजर झाल्या. त्यांना येथील न्यायालयाने २६ जूनपर्यंत पोलिस कोठडी सुनावली आहे.

येथील पंचायत समितीत शौचालय अनुदान घोटाळ्याबाबत १९ एप्रिल २०२२ ला गुन्हा दाखल करण्यात आला होता.(Toilet scam case Suspect Manjushree Pawar arrested Jalgaon Crime News)

ऑगस्ट २०२० ते फेब्रुवारी २०२२ या काळात दीड कोटी रुपयांपेक्षा जास्त शासकीय अनुदानाचा गैरव्यवहार करून समाधान निंभोरे (गट समन्वयक) व मंजुश्री पवार (समूह समन्वयक) या दोघा कंत्राटी कर्मचाऱ्यांनी मिळून हा गैरव्यवहार केल्याचे फिर्यादीत म्हटले होते.

आतापर्यंत या घोटाळ्यातील २७ संशयित आरोपींना पोलिसांनी अटक केली असून, मंजुश्री पवार या अटक झालेल्या २८ व्या संशयित आरोपी आहेत.

यातील बहुतेक सर्व संशयितांकडून पोलिसांनी घोटाळ्यातील १ कोटी रुपयांपेक्षा जास्त रकमेची वसुली केली आहे. श्रीमती पवार यांनी ४ लाख २० हजार रुपयांचा घोटाळा केल्याचे पोलिस तपासात निष्पन्न झाले आहे. या बाबत आधिक तपास सहायक पोलिस निरीक्षक आखेगावकर करीत आहेत.

हेही वाचा : Credit Card फसवणूक....काय घ्याल काळजी?