Jalgaon Crime News : तलवार बाळगल्याप्रकरणी टहाकळीच्या तरुणास अटक

Jalgaon Crime News : येथून जवळच असलेल्या टहाकळी गावात एका तरुणाने घरात तलवार लपविली असल्याची माहिती पोलिसांना मिळाली होती.

त्यावरून संशयिताच्या घराची झडती घेतली असता तलवार आढळून आल्याने पोलिसांनी संशयितासह तलवारीसह ताब्यात घेतले. (Youth arrested for possession of sword jalgaon crime news)

वरणगाव पोलिस ठाण्याचे सहाय्यक पोलिस निरीक्षक आशिषकुमार आडसूळ यांना सोमवारी (ता.२) गुप्त माहिती मिळाली की टहाकळी येथील आकाश प्रल्हाद सोनवणे (वय २३) याच्याकडे तलवार आहे. त्याने सोशल मीडियावर तलवारसोबत फोटो देखील शेअर केले आहे.

त्या अनुषंगाने सहाय्यक पोलिस निरीक्षक आडसूळ, पोलिस उपनिरीक्षक परशुराम दळवी यांनी सोमवारी(ता. २) दुपारी संशयित आकाश सोनवणे याच्या घराची झडती घेतली असता दोन हजार रुपये किमतीची दोन फूट लांब लोखंड धातूची पितळी मूठ व दीड इंच रुंद पाते असलेली तलवार आढळून आली.

पोलिसांनी शस्त्र जप्त करून संशयित आकाश सोनवणे याने गावात दहशत निर्माण करण्याच्या इराद्याने अवैधरीत्या घरात तलवार बाळगल्याप्रकरणी त्याला अटक केली.

पोलिस कर्मचारी योगेश पाटील यांच्या फिर्यादीवरून गुन्हा दाखल केला आहे. या प्रकरणाचा तपास आशिषकुमार आडसुळ यांचे मार्गदर्शनाखाली पोलिस कर्मचारी नावेद अली करीत आहेत.