सिंधुदुर्गात दीडशे शिक्षक वरिष्ठ श्रेणीपासून वंचित 

ओरोस ( सिंधुदुर्ग ) - जिल्ह्यातील 150 प्राथमिक शिक्षक वरिष्ठ वेतनश्रेणीपासून वंचित आहेत. त्यांना ही वेतनश्रेणी मिळावी, अशी मागणी अखिल जिल्हा प्राथमिक शिक्षक संघाने प्राथमिक शिक्षणाधिकारी एकनाथ आंबोकर यांच्याकडे निवेदनाव्दारे केली आहे. 

जिल्हाध्यक्ष के. टी. चव्हाण, जिल्हा सचिव गुरुदास कुबल, चेतन गोडेकर, संदीप शेळके, विजय केळकर, पांडुरंग मोरये, राजा कविटकर, उदय गोसावी, पांडुरंग कोकरे आदी उपस्थित होते. शिक्षणाधिकारी यांना दिलेल्या निवेदनात 2003 ते 2011 या कालावधीत प्राथमिक शिक्षक पदावर मागासवर्गीय प्रवर्गातील प्रशिक्षित उमेदवार उपलब्ध न झाल्याने अप्रशिक्षित बारावी उत्तीर्ण उमेदवार यांची प्राथमिक शिक्षक पदावर शासन आदेशाने नियुक्ती करण्यात आली. या शिक्षकांना प्रशिक्षित होण्यासाठी 4 ते 7 वर्षे एवढा कालावधी लागला.

परिणामी 12 वर्षे नियमित सेवा होवुनही वरिष्ठ वेतनश्रेणी करिता 12 वर्षे प्रशिक्षणानंतरचा कालावधी पूर्ण होत नसल्याने हे शिक्षक वरिष्ठ वेतनश्रेणी पासून वंचित राहिले आहेत. शासनाने सुधारित आदेश काढून कर्मचाऱ्याने 12 वर्षाच्या नियमित सेवा कालावधीत आवश्‍यक अहर्ता धारण केल्यास त्याला 12 वर्षाच्या नियमित सेवेनंतरच्या लगतच्या तारखेस अथवा 12 वर्षाच्या नियमित सेवेनंतर अहर्ता धारण केल्यास अहर्ता धारण तारखेस वरिष्ठ वेतनश्रेणी लाभ मान्य करण्यात आला आहे. त्यामुळे जिल्ह्यात अशाप्रकारे कार्यरत असलेल्या शिक्षकांना याचा लाभ मिळावा. अशाप्रकारे जिल्ह्यात 150 पेक्षा जास्त शिक्षक कार्यरत आहेत, असे या निवेदनात नमूद केले आहे.