Online Dating App वरुन लग्नाचं आमिष दाखवून उच्चशिक्षित तरुणाला इंग्लंडच्या महिलेनं पाच लाखांचा घातला गंडा

वेंगुर्ले : रेडी बोंबडोजीचीवाडी (ता. वेंगुर्ले) येथे राहणाऱ्या उच्चशिक्षित तरुणाला एका महिलेने ऑनलाईन डेटिंग अॅपवरुन (Online Dating App) लग्नाचे (Marriage) आमिष दाखवून ५ लाख ४० हजार २२३ रुपयांचा गंडा घातला. संबंधित तरुणाने याबाबत येथील पोलिसांत तक्रार दाखल केली असून त्या महिलेविरोधात गुन्हा दाखल करण्यात आला आहे.

याबाबत अधिक माहिती अशी की : संबंधित तरुण हा रेडी-बोंबडोजीचीवाडी येथे राहतो. त्याने बीइ इलेक्ट्रिकल शिक्षण घेतले असून तो कोकण रेल्वेमध्ये असिस्टंट लोको पायलट या पदावर कामावर आहे. एका ऑनलाईन डेटिंग अॅपवरुन मूळ गुजरात येथे राहणाऱ्या व सध्या इंग्लंड (England) येथे वास्तव्यास असलेल्या ड्रीटी आकाश नामक महिलेने या तरुणाशी ओळख केली.

त्या दोघांच्यात ऑनलाईन संभाषण होऊन मैत्री (Friendship) झाली व त्यांचे प्रेम जुळले. यानंतर आपल्याला लग्न करायचे आहे, असे सांगून ती महिला आपण दिल्ली विमानतळावर आले असल्याचे व वेगवेगळी कारणे सांगत ३० ऑक्टोबर २०२३ ते ८ डिसेंबर २०२३ या कालावधीत त्या तरुणाकडून सुमारे ५ लाख रुपये उकळले.

याबाबत त्या तरुणाने आज येथील पोलिसांत फसवणूक झाल्याची तक्रार दाखल केली आहे. यानुसार त्या महिलेवर गुन्हा दाखल केला असून येथील पोलीस निरीक्षक अतुल जाधव याचा अधिक तपास करत आहेत.