केवळ दोन मीटरच्या अंतरावर होते गवे ; त्याचक्षणी दुचाकी पडली बंद अन् ..

सावंतवाडी (सिंधुदुर्ग) : दांडेली-घोणसेवाडी येथून मळेवाड रुग्णालयात जात असताना दुचाकी समोर अचानक गव्यांचा कळप आला. प्रसंगवधान राखत चालकाने आपल्यासह शालेय मुलीची सुटका केल्यामुळे अनर्थ टळला.

दांडेली घोणसेवाडी येथून तंटामुक्त समिती माजी अध्यक्ष देवेंद्र माणगावकर हे आपल्या मुलीसह मळेवाड प्राथमिक आरोग्य केंद्रात जात होते. घोणसेवाडी पुलाजवळ शुक्रवारी रात्री ८ वाजताच्या सुमारास अचानक चार ते पाच गव्यांनी त्यांचा रस्ता अडविला. त्याचक्षणी दुचाकी बंद पडली. गाडीपासून केवळ दीड ते दोन मीटरच्या अंतरावर गवे असल्याने मुलीने घाबरून आरडाओरड केली; परंतु पाच मिनिटे तरी गवे रस्त्यावर ठाण मांडून होते.

हेही वाचा - ग्रामस्थांच्या चलाखीमुळे गुरांच्या तस्करीची भांडाफोड ; सापळा रचून भामट्याना पकडले -

देवेंद्र माणगावकर यांनी प्रसंगावधन राखून दुचाकी सुरू केली व आपल्यासह मुलगी दीपीक्षाचे प्राण वाचविले. बांदा-शिरोडा मार्गावरून ये-जा करणाऱ्या दुचाकीस्वारांची गव्यांनी अनेकवेळा वाट अडविल्याच्या घटना घडल्या आहेत. अशा धोकादायक प्राण्यांपासून ग्रामस्थांचे संरक्षण करण्यासाठी वनविभागाने तत्काळ उपाययोजना करण्याची मागणी तंटामुक्त समिती माजी अध्यक्ष माणगावकर यांनी केली आहे.

संपादन - स्नेहल कदम