Ratnagiri : 'तुम्ही मागासवर्गीय आहात, जाकादेवीत राहिलात तर रॉकेल टाकून पेटवून देऊ'; चौघांविरुद्ध अॅट्रॉसिटी गुन्हा

रत्नागिरी : तालुक्यातील जाकादेवी (Jakadevi Ratnagiri) येथे लाथाबुक्क्यांनी मारहाण करून ठार मारण्याची धमकी देणाऱ्या चार संशयितांविरुद्ध ग्रामीण पोलिस (Ratnagiri Police) ठाण्यात अॅट्रॉसिटी गुन्हा दाखल करण्यात आला आहे. प्रतीक देसाई, सुधीर देसाई, बंड्या देसाई, दत्ता देसाई अशी संशयितांची नावे आहेत.

हा प्रकार २९ व ३० मार्च २०२३ ला सायंकाळी जाकादेवी येथे घडला. पोलिसांकडून मिळालेल्या माहितीनुसार, संशयितांनी काही कारण नसताना फिर्यादी व साक्षीदार यांना मारहाण करून ठार मारण्याची धमकी दिली तसेच फिर्यादी यांना जातीवरून बोलले.

तुम्ही जाकादेवी येथे राहू शकत नाही. तुम्ही आत्ताच्या आता घर खाली करा, अशी धमकी दिली. ३० मार्चला फिर्यादी हे कामासाठी बाहेर जात असताना त्यांच्या गाडीभोवती चिरे लावले म्हणून त्यांच्या आईने संशयितांना विचारणा केली असता संशयित दत्ता देसाई यांनी तुमच्या मुलाला आम्हाला जीवे ठार मारायचे आहे. तोपर्यंत गाडी आमच्या ताब्यात राहील. तुम्ही मागासवर्गीय आहात.

जाकादेवीत राहिलात तर तुला रॉकेल टाकून पेटवून देऊ, असे बोलून संशयितांनी सायंकाळी सात ते आठ या वेळेत सेंट्रल बॅंक जाकादेवी येथे पुन्हा बोलवून धमकी दिली अशी फिर्याद ग्रामीण पोलिस ठाण्यात तक्रार दिली. तक्रारीवरून संशयितांविरुद्ध अॅट्रॉसिटी (Atrocity Act) गुन्हा दाखल केल्याचे पोलिसांनी सांगितले.