'तू आईला शिव्या का घालतोस' म्हणत सख्ख्या भावालाच ठार मारण्याची धमकी; पुर्णगड पोलिसांत गुन्हा दाखल

पावस : तालुक्यातील गणेशगुळे-गुरववाडी येथे ‘आईला शिव्या का घालतोस’, अशी विचारणा करणाऱ्या सख्ख्या भावाला शिवीगाळ करून ठार मारण्याची धमकी देणाऱ्या संशयिताविरुद्ध पुर्णगड सागरी सुरक्षा पोलिस ठाण्यात (Purnagad Police Station) गुन्हा दाखल करण्यात आला आहे.

राकेश चंद्रकांत नागवेकर असे संशयिताचे नाव आहे. ही घटना शनिवारी (ता. २३) दुपारी सव्वा एकच्या सुमारास घडली. पोलिसांकडून मिळालेल्या माहितीनुसार फिर्यादी मुकेश चंद्रकांत नागवेकर हे घरी जेवण करत असताना त्यांचा सख्खा भाऊ संशयित राकेश काही कारण नसताना दारूच्या नशेमध्ये आईला घाणेरड्या शिव्या घालत होता.

हे सर्व चालू असताना ‘तू आईला शिव्या का घालतोस’, असे विचारले असता राकेश याने मुकेशला शिवीगाळ करण्यास सुरवात केली. त्यानंतर घराच्या मागील बाजूस ओढत नेऊन डोक्यात कवले मारून त्याला दुखापत केली. तसेच ‘तू जास्त बोललास तर तुला ठार मारून टाकीन’ अशी धमकी दिली. या प्रकरणी मुकेश नागवेकर यांनी पूर्णगड पोलिस ठाण्यात तक्रार दिली. तक्रारीवरुन पोलिसांनी संशयिताविरुद्ध गुन्हा दाखल केला आहे.