Konkan Graduate Election : मोखाड्यात पदवीधर निवडणुकीच्या मतदानात राडा; मविआ-महायुतीच्या कार्यकर्त्यांमध्ये जोरदार बाचाबाची

मोखाडा : कोकण पदवीधर मतदार संघासाठी (Konkan Graduate Constituency) आज मतदान होते. मोखाड्यात मतदान प्रक्रिया सुरू असताना पैसे वाटप केल्याच्या आरोपावरून महाविकास आघाडी आणि महायुतीचे पदाधिकारी एकमेकांना भिडले. मात्र, उपस्थितांनी मध्यस्थी करून हे प्रकरण बाचाबाची होत असतांनाच मिटवले आहे. 

मोखाड्यात कोकण पदवीधर मतदार संघाचे मतदान (Voting) तहसीलदार कार्यालयात सुरू झाले होते. महायुतीचे उमेदवार निरंजन डावखरे (Niranjan Dawkhare) यांच्यासाठी मोखाडा नगरपंचायत (Mokhada Nagar Panchayat) लगत महायुतीचे पदाधिकारी मंडप टाकून बसले होते. तर, त्यांच्याच जवळच्या जागेत महाविकास आघाडीचे उमेदवार रमेश किर यांच्यासाठी आघाडीचे पदाधिकारी बसले होते.

यावेळी महायुतीचे पदाधिकारी मतदारांना पैसे वाटप करत असल्याचा आरोप काँग्रेसचे मोखाडा तालुकाध्यक्ष जमशिद शेख यांनी केला. यातूनच दोन्ही कडील पदाधिकारी भिडले. यावेळी भाजप मोखाडा तालुकाध्यक्ष संतोष चोथे आणि काँग्रेसचे तालुकाध्यक्ष जमशिद शेख हे एकमेकांवर धावून गेले. यांच्यात शाब्दिक बाचाबाची झाली. यावेळी युती व आघाडीच्या इतर पदाधिकाऱ्यांनी मध्यस्थी करून वातावरण शांत केले.