एकाच दिवसात नशीब चमकलं ; मच्छीमार झाला लखपती, बंपर माशाची लागली लॉटरी

रत्नागिरी : शहराजवळील मिरकरवाडा बंदरातील एका मच्छीमारी नौकेला बंपर सरंगा मिळाला. वीस लाखांहून अधिक किंमतीचा मासा एकाच मच्छीमाराला मिळण्याची महिन्याभरातील पहिलीच वेळ असल्याची चर्चा सुरू होती. बदलत्या प्रवाहामुळे एकाच ठिकाणी ही मासळी मिळाल्याचा अंदाज मच्छीमारांकडून वर्तविला जात आहे.

नैसर्गिक संकटांमुळे यंदाचा मच्छीमारी हंगाम अडचणीत आला आहे. ३१ डिसेंबरपासून पर्ससिननेट बंदीला सुरवात होणार आहे. गेले काही दिवस मतलई वारे वाहत असून थंडीचा कडाकाही वाढलेला आहे. वेगवान वाऱ्यामुळे पाण्यातील प्रवाह पुढे सरकत आहे. परिणामी मासेही रत्नागिरीच्या किनारी भागातून पुढे श्रीवर्धनच्या दिशेने सरकू लागले आहेत.

हेही वाचा - अर्ध्यावरतीच डाव मोडला! नवविवाहितेचा अपघाती मृत्यू -

जयगड किनारपट्टीपासून सुमारे २८ वाव खोल समुद्रात मिरकरवाडा येथील एका मच्छीमारी नौकेला सुमारे ६ टन बंपर सरगा मिळाला. सध्या सरंग्याला बाजारात ३५० ते ४०० रुपये किलो दर मिळत आहे. परप्रांतीय नौकांचा धुडगूस सुरू असल्यामुळे स्थानिक मच्छीमारांच्या हाती काहीच लागत नाही. 
त्यामध्ये बंपर सरगा मिळाल्याने संबंधित मच्छीमार लखपती झाल्याची चर्चा मिरकरवाड्यात सुरू आहे.

परंप्रांतीयांचा धुडगूस सुरूच

मतलई वारे वाहत असून थंडीचा कडाकाही सुरू झाला आहे. वेगवान वाऱ्यांमुळे प्रवाह बदलतात आणि त्याचा परिणाम मासेमारीवर होतो. प्रवाहाबरोबर माशांचे थवेच्या थवे पुढे सरकतात. सध्या परप्रांतीय मासेमारी नौकांनी रत्नागिरी जिल्ह्याच्या किनाऱ्यावर धुडगूस घातला असून त्याचा फटका स्थानिक मच्छीमारांना बसला. अनेक मच्छीमारांना मोजकीच मासळी मिळत आहे.

हेही वाचा -  रत्नागिरी जिल्ह्यात कॉंग्रेसला प्रबळ नेतृत्वाची प्रतीक्षा -

संपादन - स्नेहल कदम