सिंधुदुर्गात मुसळधार पाऊस; तेरेखोल नदी पातळीत वाढ

बांदा (सिंधुदुर्ग) : सिंधुदुर्ग जिल्ह्यात रात्रभर कोसळणाऱ्या मुसळधार पावसाने सावंतवाडी तालुक्यातील बांदा येथील तेरेखोल नदीच्या पाण्याची पातळी वाढली आहे. नदीच्या पुराचे पाणी पात्राबाहेर येऊन बांदा शहरातील आळवाडी बाजारपेठेत घुसले आहे. शहरातील आळवाडी-निमजगा रस्ता पाण्याखाली गेला आहे. येथील स्थानिक व्यापाऱ्यांनी दुकानातील सामान सुरक्षितस्थळी हलविले आहे. (in banda al wadi market, flood water of terekhol river has infiltrated into the building)

बांदा शहर व परिसरात मुसळधार पाऊस सुरु आहे. सततधार कोसळणाऱ्या पावसाने तेरेखोल नदी दुथडी भरून वाहत आहे. आज पहाटेच्या सुमारास तेरेखोल नदीच्या पुराचे पाणी भरण्यास सुरुवात झाल्याने व्यापारी व स्थानिकांची एकच तारांबळ उडाली. आळवाडी येथील अनेक दुकाने व घरांमध्ये पुराचे पाणी शिरले आहे. पाण्याची पातळी वाढत असून स्थानिक प्रशासनाने नागरिकांना सतर्कतेच्या सूचना दिल्या आहेत.

आळवाडी येथील मच्छीमार्केट इमारतीत पुराचे पाणी घुसले आहे. येथील आळवे यांच्या हॉटेलपर्यंत पुराचे पाणी आहे. मात्र आळवाडी-निमजगा रस्ता पहाटेच पाण्याखाली गेला आहे. येथील छोटे विक्रेते, स्टॉल, चिकन सेंटर मध्ये पाणी शिरले आहे. मुंबई-गोवा महामार्गाच्या दुतर्फा देखील सखल भागात पाणी आल्याने अनेक घरांमध्ये पुराचे पाणी शिरले आहे. पावसाचा जोर अद्याप असल्याने व पाणी पातळी वाढत असल्याने पूर प्रवण क्षेत्रातील नागरिक चिंतेत आहेत.