राजापूर : भरधाव टेम्पोच्या धडकेत दोन मुली ठार

राजापूर : रस्त्यावर काम करणाऱ्या चार कामगार मुलींना भरधाव टेम्पोची धडक बसल्याने दोन मुली जागीच ठार झाल्या, तर अन्य दोन गंभीर जखमी आहेत. तालुक्यातील बाकाळे येथे सागरी महामार्गावरील धोकादायक वळणावर आज दुपारी दीड वाजता ही दुर्घटना घडली. जखमींना पुढील उपचारासाठी रत्नागिरीत हलविण्यात आल्याची माहिती पोलिसांनी दिली.

याबाबत पोलिसांकडून मिळालेली माहिती अशी, सागरी महामार्गावर बाकाळे येथे धोकादायक वळणावर रस्त्याचे काम सुरू आहे. त्यासाठी परजिल्ह्यातील काही कुटुंबे मजुरीवर तेथे काम करीत आहेत. या कुटुंबातील काही मुले दुपारी रस्त्यावर नेहमीप्रमाणे खेळत होती. अशातच समोरून आलेल्या भरधाव टेम्पोने या मुलांना जोरदार धडक दिली. यामध्ये १२ वर्षीय मुलीचा जागीच मृत्यू झाला, तर अन्य पाच वर्षांच्या मुलीचा उपचारासाठी नेत असताना मृत्यू झाला. त्या अपघातामध्ये आणखी दोन मुले गंभीर जखमी झाली आहेत. त्यांना अधिक उपचारासाठी रत्नागिरी येथे हलविण्यात आल्याची माहिती नाटे पोलिसांनी दिली.

दरम्यान, या अपघातानंतर टेम्पोचालक गाडी सोडून पसार झाला आहे. या घटनेची माहिती नाटे पोलिस ठाण्याचे पोलिस निरीक्षक आबासो पाटील आणि सहकाऱ्यांना मिळताच तत्काळ घटनास्थळी दाखल झाले. त्यांनी तातडीने पंचनामा करण्यासह जखमींना अधिक उपचारासाठी हलविण्याच्यादृष्टीने स्थानिकांच्या साथीने प्रयत्न केले. या अपघातप्रकरणी गुन्हा दाखल करण्याचे काम सायंकाळी उशिरापर्यंत सुरू होते.