Parshuram Ghat : मुंबई-गोवा महामार्गावरील परशुराम घाटातली धोकादायक दरड हटवली, पण 'या' मार्गावर मोठी कोंडी

चिपळूण : मुंबई-गोवा महामार्गावरील (Mumbai-Goa Highway) परशुराम घाटातील (Parashuram Ghat) दुसऱ्या लेनचे कामही पूर्णत्वाच्या मार्गावर असून, घाटात धोकादायक भागातील दरडही हटवण्यात आलेली आहे. या ठिकाणी काँक्रिटीकरणाचे काम सुरू असून, लवकरच दुसरी लेनही वाहतुकीस खुली होणार आहे.

त्याबरोबर रखडलेल्या पेढे फरशीतिठा येथील काँक्रिटीकरणाची एक लेन पूर्ण झाली असून, ती आठवडाभरात खुली करण्यात येणार आहे; मात्र येथे पर्यायी अरूंद रस्त्यामुळे आणखी आठवडाभर फरशीतिठा येथे वाहतूककोंडीला सामोरे जावे लागणार आहे.

महामार्गाचे चौपदरीकरण गेल्या अनेक वर्षापासून रखडलेले असून, काम अजूनही पूर्णत्वास जात नाही. परशुराम घाटात तर अनेक अडथळ्यांचे डोंगर उभे राहिले. दरड हटवून लगतच्या डोंगरकटाईचे काम पूर्ण करण्यात आले. यानंतर आता आवश्यक तेथे संरक्षक भिंत उभारून नव्या वर्षाच्या सुरवातीलाच परशुराम घाटातील दुसरी लेन वाहतुकीस सुरू होईल, असा अंदाज येत आहे. दरडीच्या बाजूने संरक्षक भिंत उभारण्याचे काम युद्धपातळीवर सुरू आहे.

परशुराम घाटासह पायथ्याशी असलेल्या पेढे फरशीतिठा परिसरात महामार्गावर सध्या वाहतूककोंडीची समस्या गंभीर बनली आहे. दिवसातून अनेकवेळा आणि विशेषतः सायंकाळच्या वेळेत येथे वाहतूककोंडी होते. त्या ठिकाणी आधी सर्व्हिस रोड करणे गरजेचे होते; परंतु त्या उलट आधी भुयारी मार्गाचे काम हाती घेण्यात आले.

सर्व्हिस रोड करण्यात न आल्याने एका मार्गावर आणि त्यातही बेशिस्तपणे वाहनालक वाहने हाकत असल्याने वाहतूककोंडी दीर्घकाळ होत आहे. सध्या या वाहतूककोंडीने सारे हैराण झाले आहेत. सध्या येथील एका लेनचे काँक्रिटीकरण पूर्णत्वास गेले असून, सध्या त्यावर पाणी मारणे सुरू आहे. आठवडाभरानंतर ही लेन वाहतुकीस खुली केली जाणार असल्याचे महामार्ग विभागाच्या सूत्रांकडून सांगण्यात आले.