Maratha Reservation : आरक्षणविरोधी भूमिका घेणाऱ्यांना समाज जागा दाखवेल; मराठा सेवा संघाचा स्पष्ट इशारा

खेड : संपूर्ण राज्यभरात मराठा आरक्षणावरून (Maratha Reservation) आंदोलन सुरू असताना कोकणात मात्र वेगळं चित्र पाहायला मिळाले. कोकण हा लढवय्या प्रांत असताना कोकणातील मराठा समाज शांत आहे. कुठेच मोर्चा नाही, आंदोलन नाही. त्यामुळे कोकणातील मराठा समाजावर कोणत्या शक्तीचा दबाव आहे. कोण मराठा समाजाला आंदोलनात उतरण्यास अडचण निर्माण करत आहे? असा आरोप मराठा सेवा संघाचे ज्येष्ठ नेते केशवराव भोसले यांनी पत्रकार परिषदेत केला आहे.

शहरातील मराठा भवन येथील सभागृहात आयोजित पत्रकार परिषदेत ते बोलत होते. ते म्हणाले, मनोज जरांगे-पाटील (Manoj Jarange-Patil) यांनी केलेले आंदोलन हे सर्वसामान्य मराठा समाजातील तरुणांसाठी आहे. ज्यांना ओबीसी प्रमाणपत्र घ्यायचं नसेल त्यांच्यावर कोणतीही जबरदस्ती नाही; पण ज्यांना त्याची खरी गरज आहे त्याला विरोध कशासाठी? खेड तालुक्यातील मराठा समाजाचा मनोज जरांगे-पाटील यांच्या भूमिकेला पाठिंबा असून जो आमच्यासोबत खांद्याला खांदा लावून लढेल त्यालाच मराठा समाज मतदान करेल.

कोकणातील मराठा समाजाच्या नेत्यांना राजकारणातून संपवले जात आहे. मराठा आरक्षणाविरोधी भूमिका घेणाऱ्यांना कोकणातील समाज जागा दाखवेल. माजी आमदार संजय कदम यांनी खेडमधील मराठा समाज हा मनोज जरांगे-पाटील यांच्या पाठीशी ठामपणे उभा राहील, असे सांगितले. या वेळी मराठा सेवा संघाचे उपाध्यक्ष प्रभाकर सुर्वे, सरचिटणीस यशवंत कदम, दीपक गुजर, नंदू साळवी, हेमंत साळोखे, संजय कडू, विश्वास शिंदे, रोहन विचार, मनोज भोसले, शरद शिर्के, दीपक नलावडे, अंकुश विचारे आदी मराठा समाजातील नेते उपस्थित होते.