Vikramgad Rain : विक्रमगड तालुक्यात 459.6 मि.मी पावसाची नोंद; नदी-नाल्यांना पूर आल्याने अनेक गावांचा तुटला संपर्क

विक्रमगड : विक्रमगड तालुक्यात (Vikramgad Rain) गेल्या तीन-चार दिवसांपासून मुसळधार पाऊस पडत असल्याने येथील नदी-नाले तुडूंब भरून वाहू लागले आहेत. आज दिवसभर मुसळधार पाऊस झाल्याने विक्रमगड तहसीलमध्ये 459.6 मि.मी पावसाची नोंद झाली आहे.

दरम्यान, भात लावणी केलेली भात शेती पाण्याने भरली असल्याने पावसाचा जोर असाच राहिला, तर भातपीक कुजून जाण्याची भीती शेतकऱ्यांनी वर्तवली आहे. तालुक्यातील अनेक नदी आणि नाल्यांना पूर आल्याने अनेक ठिकाणी पूल आणि मोरया उलटल्याने काही गावांचा काही काळ संपर्क तुटला होता.

आज सकाळी शिळ-देहर्जे व कुंर्झे - ब्राम्हणगाव मार्गावरील देहर्जे नदीवरील पुलावरून पाणी वाहू लागल्याने या मार्गावरील संपर्क काही काळ तुटला होता. तसेच विक्रमगड तालुक्यातील काही छोटे पूल काही वेळ पाण्याखाली गेले होते. तर, पुलावरून पाणी गेल्याने काही काळ वाहतूक खोळंबली होती.