Crime: सुरक्षा रक्षक मारहाणप्रकरणी सावंतवाडीत एक ताब्यात

Crime: कुटीर रुग्णालयातील सुरक्षा रक्षक प्रशांत वाडकर यांना मारहाण केल्याप्रकरणी सावंतवाडी पोलिसांनी आज एकाला ताब्यात घेतले. साईराज सुभेदार (रा. भटवाडी, सावंतवाडी) असे त्याचे नाव आहे.

अन्य एकाला अटक करण्यात येणार असून, त्याचा शोध सुरू असल्याचे सहाय्यक पोलिस निरीक्षक श्रीकांत इंगवले यांनी सांगितले. दरम्यान, याप्रकरणी संबंधितांवर सरकारी कामात अडथळा केल्याचा गुन्हा दाखल करण्यात यावा, अशी मागणी सुरक्षा रक्षकांच्या माध्यमातून करण्यात आली.

त्यानंतर ही अटकेची कारवाई करण्यात आली, असा दावा संघटनेच्या माध्यमातून करण्यात आला. या प्रकरणातील दुसऱ्या संशयिताला लवकरच अटक करण्यात येणार आहे, असे पोलिस निरीक्षक ऋषिकेश अधिकारी यांनी सांगितले.

येथील कुटीर रुग्णालयात कार्यरत असलेल्या वाडकर या कर्मचाऱ्याला किरकोळ कारणावरून मारहाण झाली होती. यात ते गंभीर जखमी झाले होते. याप्रकरणी त्यांनी तक्रार दिल्यानंतर भेदार व अन्य एकावर गुन्हा दाखल केला होता.