राजापूर : लाखाहून अधिकांनी साधली गंगास्नानाची पर्वणी!

राजापूर : मे महिन्यामध्ये दिवसागणिक हवेतील उष्मा आणि तापमान वाढत असताना शहरानजीकच्या उन्हाळे येथील प्रसिद्ध तीर्थक्षेत्री पवित्र गंगामाईचे आगमन झाले. मॉन्सूनला सुरूवात झाल्यानंतरही गंगामाई मुबलक प्रमाणात प्रवाहीत असून मूळ गंगा, काशिकुंड, गायमुख आणि सर्व कुंडांमध्ये मुबलक प्रमाणात पाण्याचा प्रवाह आहे. भर पावसाळ्यामध्येही पवित्र गंगास्नासाठी राज्यासह राज्याबाहेरील भाविक उन्हाळे तीर्थक्षेत्री गर्दी करत असून आगमनानंतर सुमारे एक लाखाहून अधिक भाविकांनी पवित्र गंगास्नानाची पर्वणी साधल्याचा अंदाज व्यक्त केला जात आहे.

शहरानजीकच्या उन्हाळे येथील तीर्थक्षेत्री गंगामाईचे होणारे आगमन आणि वास्तव्याचा काळ भाविकांच्यादृष्टीने एक धार्मिक पर्वणी असते. त्यामुळे गंगामाईच्या वास्तव्याच्या काळात विविध राज्यातील भाविक या ठिकाणी पवित्र स्नान करण्यासाठी येतात. मात्र, कोरोनातील लॉकडाऊनमुळे अनेक भाविकांनी गंगास्नानाची ही पर्वणी साधता आलेली नव्हती. गतवर्षी नोव्हेंबर महिन्यात आलेल्या गंगामाईचे साधारण अडीच-तीन महिन्याच्या वास्तव्यानंतर फेब्रुवारी महिन्यामध्ये निर्गमन झाले होते. त्यानंतर, ७५ दिवसानंतर गत महिन्यामध्ये पुन्हा एकदा गंगामाईचे उन्हाळे तीर्थक्षेत्री आगमन झाले आहे. मे महिन्यामध्ये गंगामाईने आगमनाने साऱ्‍यांना सुखद धक्का दिला.

आगमनानंतर आजपर्यंत उन्हाळे तीर्थक्षेत्री गंगामाई सर्व कुंडामधून मुबलक प्रमाणात वाहत असून वास्तवाचा तीन महिन्यांचा कालावधी गंगामाई यावेळी पूर्ण करणार का ? याकडे आता भाविकांचे लक्ष लागले आहे.

दरदिवशी हजारोंची उलाढाल

गंगामाईच्या आगमनानंतर त्या ठिकाणी विविध प्रकारची दुकाने, हॉटेल्स सुरू करण्यात आली आहेत. मान्सूनला सुरूवात झाली असली तरी, त्या ठिकाणी ही दुकाने सुरू आहेत.

गंगास्नानासाठी भाविकांची संख्या वाढत असल्याने त्याचा फायदा या दुकानदार वा व्यवसायिकांना होताना दरदिवशी या ठिकाणी हजारो रूपयांची उलाढाल होत असल्याची माहिती एका व्यावसायिकाने दिली.