श्रावण विशेष : श्री राधाकृष्ण मंदिर अलिबागकरांचे आराध्य दैवत

अलिबाग शहरापासून काही अंतरावर असलेले गवळी वाडीतील श्री राधाकृष्ण मंदिर भाविकांसाठी श्रद्धास्थान आहे. या मंदिरात स्थानिकांसह वेगवेगळ्या गावांसह शहरांतील भाविक दर्शनासाठी येतात. त्यामुळे राधाकृष्ण मंदिराची ख्‍याती सर्वदूर पसरली आहे.

गवळीवाडीमध्ये मोठ्या प्रमाणात गवळी समाज आहे. राधाकृष्ण मंदिर या ठिकाणी उभारण्याची संकल्पना येथील तरुणांनी आखली. ही संकल्पना अखेर प्रत्यक्षात उतरली. तरुणांनी एकत्र येऊन एक चांगले मंदिर या ठिकाणी उभारण्यासाठी मेहनत घेतली. काहींनी मंदिरासाठी लागणारे साहित्य, वस्तू आणल्या. काहींनी पैसे दिले; तर काहींनी राधा-कृष्णाची मूर्ती भेट देऊन लोकसहभागातून एक चांगले मंदिर उभारण्यात आले.

गेल्या अनेक वर्षांपासून उभे असलेले राधाकृष्णाचे मंदिर आबालवृद्धांचे श्रद्धास्थान ठरले आहे. दर वर्षी कृष्ण जन्माष्टमी येथे मोठ्या उत्साहात साजरी केली जाते. महिला, पुरुष व लहान मुले एकत्र येऊन पाळण्याची सजावट करतात. मंदिराला फुलांनी सजवले जाते. त्यानंतर रात्री बारा वाजता पाळणा हलवून कृष्ण जन्माष्टमीचा सण साजरा केला जातो. त्यानंतर दुसऱ्या दिवशी मंदिरासमोर दहीहंडी उभारली जाते. दुपारी सांस्कृतिक कार्यक्रम झाल्यावर दहीहंडी फोडण्याचा कार्यक्रम साजरा केला जातो. दहीहंडी फोडण्यामध्ये पुरुषांबरोबरच महिलादेखील सहभाग घेतात. मंदिरात राधाकृष्ण मूर्तीसह गणपतीची मूर्ती आहे. सभामंडपात कासवाची मूर्ती असून दर गुरुवारी रात्री या मंदिरात आरती केली जाते. ही परंपरा आजही गवळीवाडीमध्ये कायम आहे.