सिंधुदुर्ग : सिंधुदुर्ग जिल्ह्यात १२ ते १४ वयोगटातील मुलांचे लसीकरण सुरू असून, आजअखेर एकूण २५ हजार १९३ मुलांपैकी १७ हजार ६०३ मुलांचे (७० टक्के) लसीकरण पूर्ण केले आहे; तर १५ वर्षांवरील नागरिकांचे ९७ टक्के लसीकरण पूर्ण केले असल्याची माहिती जिल्हा लसीकरण अधिकारी डॉ. संदेश कांबळे यांनी आज दिली.
जिल्ह्यात १८ वर्षांवरील ९८ टक्के नागरिकांचे पहिल्या डोसचे लसीकरण पूर्ण झाले आहे; तर ८८ टक्के नागरिकांचे दुसऱ्या डोसचे लसीकरण पूर्ण झाले आहे. दोन्ही डोस घेऊन नऊ महिने पूर्ण झालेल्या नागरिकांना बूस्टर डोस देण्यात येत आहेत. १५ ते १८ वयोगटातील मुलांचेही लसीकरण ९८ टक्के पूर्ण झाले आहे. जिल्ह्यासाठी १२ ते १४ वयोगटातील मुलांसाठी कोर्बोवॅक्स लसीचे ३० हजार डोस उपलब्ध झाले असून, २१ मार्चपासून या वयोगटातील मुलांचे लसीकरण सुरू करण्यात आले आहे. १२ ते १४ वयोगटातील २५ हजार १९३ मुले आहेत.
या मुलांना शाळेत जाऊन लसीकरण करण्यात येत आहे. १२ ते १४ वयोगटातील एकूण २५ हजार १९३ लाभार्थी मुलांपैकी आजपर्यंत १७ हजार ६०३ मुलांचे लसीकरण पूर्ण झाले आहे. आजपर्यंत ७० टक्के लसीकरण पूर्ण झाले आहे. उर्वरित ३० टक्के मुलांचे लसीकरण येत्या आठवडाभरात पूर्ण करण्यात येईल, असे या वेळी डॉ. कांबळे यांनी सांगितले.
जिल्ह्यात सर्वात प्रथम ४५ वर्षांवरील नागरिकांना कोव्हिशिल्ड व कोव्हॅक्सिन लस देण्यास सुरुवात करण्यात आली होती. त्यानंतर १८ वर्षांवरील ते ४४ वयोगटातील नागरिकांना लस देण्यात आली. १५ ते १८ वर्षे वयोगटातील मुलांचे लसीकरण करण्यात आले आहे. या सर्व वयोगटातील नागरिकांचे लसीकरण ९७ टक्के पूर्ण झाले आहे. आता १२ ते १४ वयोगटातील २५ हजार १९३ मुलांचे लसीकरण सुरू असून, अद्यापही ३० मुलांचे लसीकरण शिल्लक आहे. ते लवकरच पूर्ण करण्यात येईल, असे डॉ. कांबळे यांनी सांगितले.
खबरदारी आवश्यक
जिल्हा ३१ मार्चला कोरोनामुक्त झाला आहे. त्यानंतर गेल्या १२ दिवसांत एकही कोरोना पॉझिटिव्ह रुग्ण सापडलेला नाही, ही समाधानाची बाब असली, तरी खबरदारी घ्यायला हवी. त्यासाठी नागरिकांनी कोरोना प्रतिबंधक लस घेणे आवश्यक आहे.
अद्यापही ज्यांनी लस घेतली नाही, त्यांनी आरोग्य केंद्रात जाऊन लस घ्यावी व भविष्यातील धोका टाळावा. सद्यस्थितीत वातावरणातील बदल आणि अधूनमधून पडणारा पाऊस यामुळे तापसरीची साथ येऊ शकते. तरी घाबरून न जाता तत्काळ शासकीय दवाखान्यात उपचार करून घ्यावेत.
- डॉ. संदेश कांबळे,जिल्हा लसीकरण अधिकारी
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.