एसटीच्या टायरचे रिमोल्डचे रबर पूर्णतः निघाले

एसटीच्या टायरचे रिमोल्डचे
रबर पूर्णतः निघाले
कराडनजीक खोळंबा ; प्रवासी संतप्त
देवरूख, ता. २२ः रिमोल्ड टायर घातलेली गाडी दामटण्यात आली खरी, मात्र त्याच टायरचे रिमोल्डचे रबर पूर्णतः निघाले, अन प्रवासी हैराण झाले. ही गाडी लांब पल्ल्याची असल्याने प्रवासी या कारभाराबाबत संतापले होते.
देवरूख बस स्थानकावरून सकाळी सव्वाआठला सुटणारी देवरूख-पुणे गाडी (एमएच-०९-एफएएल-१०७५) ही बस सकाळी देवरूख डेपोत मागील टायर पंक्चर झाल्याने दुरुस्तीला दिली. रिमोल्ड केलेला टायर टाकून हेड मॅकेनिक यांनी गाडी चेक करून दिली. गाडी प्रवाशांना घेऊन पुण्याच्या दिशेने निघाली. ती कराड जवळ जाताच त्याच टायरचे रिमोल्डचे रबर पूर्णतः निघाले. पंक्चर काढण्यासाठी रस्त्यात एकही दुकान सुरू नसल्याने ही गाडी जवळ जवळ २५ किमीपर्यंत तशीच पंक्चर काढणाऱ्याकडे नेण्यात आली. लांब पल्ल्यांच्या गाड्या सुस्थितीत असायला हव्यात ही प्रवाशांची माफक अपेक्षा असते. मात्र त्याला एसटी महामंडळाचे अधिकारी तिलांजली देताना दिसत आहेत. त्यांना प्रवाशांच्या जीवाशी काही देणे घेणे दिसत नसल्याचे या प्रसंगावरून निदर्शनास येत आहे.