दुचाकी-रिक्षा अपघातामध्ये पोलिसाच्या हाताची बोटे तुटली

दुचाकी-रिक्षा अपघातामध्ये
पोलिसाच्या हाताची बोटे तुटली

सावंतवाडी शहरातील अपघात

सकाळ वृत्तसेवा
सावंतवाडी, ता. १३ ः येथील पोलिस ठाण्याचे वाहतूक पोलिस कर्मचारी राजेंद्र मुरारी राणे (रा. इन्सुली) हे सावंतवाडीत झालेल्या दुचाकी रिक्षा अपघातात गंभीर जखमी झाले. त्यांच्या हाताची दोन बोटे तुटली असून त्यांच्यावर गोवा मेडिकल कॉलेजमध्ये (गोमेकॉत) उपचार सुरू आहेत. हा अपघात आज दुपारी दोनच्या सुमारास शहरातील कारागृहानजीक घडला.
याबाबत अधिक माहिती अशी ः अपघातातील रिक्षाचालक नारायण शिवराम राऊळ (रा. नाणेली, ता. कुडाळ) हे आपल्या खासगी कामानिमित्त पत्नी व मुलीसह सावंतवाडीत आले होते. ते शहरातील कारागृहाच्या बाजूने असलेल्या रस्त्याने जुन्या मुंबई-गोवा महामार्गावर आले असता समोरून तीन मुशीकडून पोलिस ठाण्याच्या दिशेने जाणाऱ्या पोलिस कर्मचारी राणे यांच्या ताब्यातील दुचाकीची धडक रिक्षाला बसली. यात श्री. राणे हे दुचाकीसह रस्त्यावर कोसळून काही अंतर फरफटत गेले. यात त्यांच्या हाताची दोन बोटे रस्त्यावर तुटून पडली. त्यानंतर त्यांना तेथील नागरिकांनी तत्काळ उपजिल्हा रुग्णालयात हलवले. त्यावर त्या ठिकाणी प्राथमिक उपचार करून अधिक उपचारासाठी गोवा मेडिकल कॉलेजमध्ये (गोमेकॉ) हलविण्यात आले. अपघातानंतर पोलिस निरीक्षक ऋषिकेश अधिकारी यांनी रुग्णालयात जाऊन त्यांची विचारपूस केली. या संदर्भात पोलिस ठाण्यात अपघाताची नोंद करण्याची प्रक्रिया सुरू होती.