आमदार साळवींच्या नेतृत्वात 143 लाखाचा पाणीटंचाई आराखडा तयार; 'या' गावांचा समावेश

राजापूर : एप्रिल-मेमध्ये भेडसावणाऱ्या संभाव्य पाणीटंचाईला (Water Shortage) सामोरे जाण्यासाठी पंचायत समितीतर्फे आतापासून उपाययोजना हाती घेतल्या आहेत. त्यामध्ये आमदार राजन साळवी (Rajan Salvi) यांच्या नेतृत्वाखाली पंचायत समितीने १४३ लाखाचा पाणीटंचाई आराखडा तयार केला आहे. त्यामध्ये ३७ गावे आणि १२४ वाड्यांचा समावेश आहे.

आराखड्यामध्ये समावेश असलेली गावे आणि वाड्यांमधील संभाव्य पाणीटंचाई दूर करण्यासाठी नवीन नळपाणी योजना तयार करणे, जुन्या नळपाणी योजनेची दुरुस्ती करणे, विंधन विहीर बांधणे, सार्वजनिक विहीर वा साठवण टाकी बांधणे आदी उपाययोजनांचा समावेश केला आहे.

गेली दोन वर्ष एप्रिल-मेमध्ये पाणीटंचाईची झळ पोहचली असली तरी तालुका टँकरमुक्त आहे. अशी स्थिती असली तरी दरवर्षीप्रमाणे यावर्षीही एप्रिल-मेमध्ये पाणीटंचाईची झळा पोहचण्याची शक्यता आहे. त्यामुळे पंचायत समितीने आतापासून उपाययोजना हाती घेतल्या आहेत. लोकसहभागातून ग्रामपंचायतीच्या माध्यमातून बंधारे बांधले आहेत. त्यामध्ये मुबलक प्रमाणात पाणीसाठा झाला आहे.

संभाव्य पाणीटंचाई आराखडाही प्रशासनाने केला आहे. या आराखड्यामध्ये सोलगाव, देवीहसोळ, पडवे, धाऊलवल्ली, नाणार, प्रिंदावण-बांदीवडे, जुवाठी, कशेळी, गोठणेदोनिवडे, परूळे, खरवते, ओझर, कोदवली, सागवे, कुंभवडे, मिळंद-सावडाव, येळवण, नाटे, अणसुरे, साखर, वाल्ये, सौंदळ, कोंड्येतर्फ राजापूर, दोनिवडे, हसोळतर्फ सौंदळ, झर्ये, मोसम, दळे, डोंगर, पांगरीखुर्द, कोंडसर बुद्रुक, आजिवली, महाळुंगे, उन्हाळे, खिणगिणी, मोगरे या गावांमधील विविध कामांचा समावेश आहे. टंचाई आराखडा जिल्हा परिषदेकडे मंजुरीसाठी पाठवला आहे.

राजापूर आराखडा

• एकूण गावेः ३७

• एकूण वाड्याः १२४

• अंदाजित रक्कमः १४३.२५ लाख

कामाचे स्वरूप प्रस्तावित योजना प्रस्तावित गावे प्रस्तावित वाड्या अंदाजित खर्च

• विंधन विहिरी घेणे ७० २६ ७० ९०

• नळपाणी योजना दुरुस्ती २ २ ३ २०

• विंधन विहीर दुरुस्ती २ २ ३ १०

• तात्पुरती पूरक पाणी योजना १ १ १ १०

• नवीन नळपाणी योजना १ १ १ १०

• सार्वजनिक विहीर पाणी योजना दुरुस्ती ३ ३ ४ १३

• साठवण टाकी दुरुस्ती २ २ २ ९