शिवसेनेची 'ती' जागा कोणत्याही परिस्थितीत भाजपला सोडली जाणार नाही; रामदास कदमांनी कोणत्या जागेवर केलाय दावा?

खेड : आपण दोघे भाऊ भाऊ, तुझे ते वाटून खाऊ आणि माझ्याला हात नको लाऊ... ही भाजपची (BJP) नीती बनली आहे. रत्नागिरी लोकसभा मतदारसंघाची (Ratnagiri Loksabha Constituency) जागा शिवसेनेची (Shiv Sena) आहे, ती कोणत्याही परिस्थितीत सोडली जाणार नाही, असे प्रतिपादन ज्येष्ठ नेते रामदास कदम (Ramdas Kadam) यांनी केले.

रत्नागिरी जिल्ह्यातील खेड येथे रायगड लोकसभा (Raigad LokSabha) मतदारसंघाचा भाग असलेल्या लोटे येथे पत्रकार परिषदेत ते बोलत होते. राष्ट्रवादीचे नेते सुनील तटकरे यावेळी हजर होते. कोकणातील राजकारण आता लोकसभा निवडणुकीपूर्वी तापू लागले आहे. शुक्रवारी शिवसेना नेते रामदास कदम यांनी लोटे येथे राष्ट्रवादी नेते सुनील तटकरे यांच्यासोबत सभा घेऊन शक्तिप्रदर्शन केले.

यावेळी सभेपूर्वी माध्यमांसोबत बोलताना रामदास कदम म्हणाले, प्रत्येकाला आपला पक्ष वाढवायचा अधिकार आहे; पण भाजप रायगडमध्ये पण आम्ही, रत्नागिरीमध्ये पण आम्ही असे म्हणत असेल, तर ते योग्य नाही. हे म्हणजे असे आहे आपण दोघे भाऊ भाऊ तुझे ते वाटून खाऊ आणि माझ्याला हात नको लाऊ.

रायगडमध्ये तटकरे हे विद्यमान खासदार आहेत, तर रत्नागिरीत विद्यमान खासदार शिवसेनेचा आहे. सद्यस्थितीत जे रत्नागिरी- सिंधुदुर्गचे विद्यमान खासदार आहेत. त्यांच्या निवडणुकीच्या प्रचाराच्या वेळी शेवटची सभा मी घेतली होती, अशी आठवण सांगत कदम म्हणाले, ही जागा शिवसेनेची आहे. त्यामुळे कोणत्याही परिस्थितीत शिवसेना रत्नागिरी मतदारसंघ सोडणार नाही.