गणेशोत्सवासाठी कोकण रेल्वेच्या सात जादा गाड्या

गणेशोत्सवासाठी
रेल्वेच्या सात गाड्या
रत्नागिरी, ता. १९ ः गणेशोत्सवासाठी कोकण रेल्वेने सात विशेष गाड्या सोडण्याचा निर्णय घेतला आहे. त्या गाड्यांचे आरक्षण २१ जुलैपासून सकाळी आठ वाजता सुरू होणार आहे. कोकणात जाणाऱ्या प्रवाशांची मोठी व्यवस्था व्हावी यासाठी कोकण रेल्वे प्रशासनाने हा निर्णय घेतला आहे. त्यामुळे गणेशोत्सवात प्रवाशांना मोठा दिलासा मिळणार आहे. गणेशोत्सवात दरवर्षी मुंबईहून कोकणात येताना आणि कोकणातून मुंबईत परतताना चाकरमान्यांना कसरत करावी लागते. गाड्यांना प्रचंड गर्दी असल्यामुळे अनेकवेळा आरक्षित डब्यातून प्रवास करण्याची वेळ येते. जनरल डब्यामधून प्रवास करणे अशक्य होते. ही परिस्थिती लक्षात घेऊन कोकण रेल्वेकडून जादा गाड्या सोडण्यात येतात. त्यामध्ये मुंबई सीएसएमटी- सावंतवाडी दररोज सोडण्यात येणार असून ३६ फेऱ्यांचे नियोजन केले आहे.
छत्रपती शिवाजी महाराज टर्मिनस मुंबई येथून १ ते १८ सप्टेंबर च्या १८ फेऱ्या दररोज रात्री १२.२० वाजता सुटेल आणि त्याच दिवशी २.२० वाजता सावंतवाडी येथे पोहोचेल. सावंतवाडीवरून त्याच दिवशी दुपारी ३.१० वाजता तिचा परतीचा प्रवास सुरू होईल. मुंबई सीएसएमटी - रत्नागिरी दररोज धावणारी विशेष गाडीच्या ३६ फेऱ्यांचे नियोजन केले आहे. छत्रपती शिवाजी महाराज टर्मिनस मुंबई येथून १ ते १८ सप्टेंबर दररोज सोडण्यात येणार आहेत. ही गाडी सकाळी ११.३० वाजता सुटेल आणि त्याच दिवशी रात्री २०.१० वाजता रत्नागिरीत पोहोचेल. परतीचा प्रवास दररोज पहाटे ४ वाजता सुरू होईल. तिसरी गाडी एलटीटी - कुडाळ विशेषच्या ३६ फेऱ्या सोडण्यात येणार आहेत.
लोकमान्य टिळक टर्मिनस येथून गाडी सुटेल. एलटीटी - सावंतवाडी विशेष गाडीच्या ३६ फेऱ्यांचे नियोजन केले आहे. एलटीटी मुंबई येथून दररोज सकाळी ८.२० वाजता सुटेल आणि त्याच दिवशी रात्री २१ वाजता सावंतवाडी येथे पोचेल. दिवा-चिपळूण मेमू स्पेशल गाडीच्या ३६ फेऱ्या १ ते १८ सप्टेंबर या कालावधीत सोडण्यात येणार आहेत. एलटीटी - कुडाळ स्पेशलच्या १६ फेऱ्यांचे नियोजन केले आहे. एलटीटी-कुडाळ स्पेशल गाडीच्या ६ फेऱ्यांचे नियोजन केले आहे.