Ganpati special train booking: गणपती विशेष रेल्वेगाड्यांचे आरक्षण हाऊसफुल्ल, चाकरमान्यांचा हिरमोड, तिकीट बुकिंगमध्ये गैरप्रकार?

खेड, ता. २३ ः गणेशोत्सवाकरिता कोकणात येणाऱ्या चाकरमान्यांच्या सोयीसाठी रेल्वे प्रशासनातर्फे २०२ गणपती विशेष गाड्या चालवण्याची घोषणा करण्यात आली आहे. या रेल्वेगाड्यांचे आरक्षण रविवारी सकाळपासून सुरू झाले; मात्र काही वेळातच आरक्षण हाऊसफुल्ल झाल्यामुळे अनेकांना त्याचा लाभ घेता आला नाही. आरक्षण करणाऱ्यांना गाड्या रिग्रेट झाल्याचा संदेश आला.

konkan railway ganpati special train 2024 schedule

कोकणातील गणेशोत्सव मोठ्या उत्साहात आणि आनंदात साजरा होत असतो. यंदा गणरायाचे आगमन ७ सप्टेंबरला होणार आहे. त्यामुळे गणेशोत्सवासाठी चाकरमान्यांनी कोकणात जाण्याची तयारी सुरू केली आहे. त्यासाठी सुटीचे नियोजन करण्यासही आतापासून सुरवात केली आहे. त्याचबरोबर बप्पाच्या दर्शनासाठी आपल्या गावी जाण्यासाठी रेल्वेचे बुकींग हे त्यांच्यादृष्टीने अत्यंत महत्वाची गोष्ट असते. प्रवाशांच्या सोयीसाठी मध्यरेल्वेने कोकणासाठी २०२ गणपती विशेष गाड्या चालवण्याची घोषणा करून चाकरमान्यांना चांगलाच दिलासा दिला.

गणेशोत्सवासाठी नियोजन केलेल्या २०२ विशेष रेल्वेगाड्यांचे आरक्षण रविवारी सकाळी ८ वाजल्यापासून सुरू झाले. आरक्षण सुरू होताच काही वेळातच ''त्या'' गाड्या फुल्ल झाल्याचे निदर्शनास आले. मागील व पुढील तारखेची तिकिटे काढताना ''रिग्रेट'' असा संदेश झळकत होता. त्यामुळे तिकीट आरक्षणात गैरप्रकार होत असल्याचा संशय प्रवाशांनी व्यक्त केला आहे.

एलटीटी - कुडाळ गणपती विशेष एक्स्प्रेस ४ सप्टेंबर, ५ सप्टेंबर आणि ६ सप्टेंबरला रिग्रेट दाखवत आहे. एलटीटी-कुडाळ गणपती विशेष ४ आणि ७ सप्टेंबर तर सीएसएमटी- सावंतवाडी गणपती विशेष ५ सप्टेंबरच्या गाड्या रिग्रेट दाखवत असल्याचे काही प्रवाशांनी सांगितले. त्यामुळे अनेक चाकरमान्यांचा हिरमोड झाला आहे.

रेल्वेगाड्याचे नियोजन करा

गणेशोत्सवात कोकणात जाणाऱ्यांची संख्या सर्वाधिक असते. विशेष रेल्वेचे अवघ्या काही तासात आरक्षण फुल्ल झाले. याचा विचार प्रशासनाने करून आणखी रेल्वे गाड्यांचे नियोजन करावे अशी मागणी चाकरमान्यांच्यातून होत आहे.