आरोग्य शिबिरात ७३ ग्रामस्थांची तपासणी

आरोग्य शिबिरात ७३ ग्रामस्थांची तपासणी

चिखलीत आयोजन; श्री गणेश मंदिर मंडळाचा पुढाकार

सकाळ वृत्तसेवा
सावर्डे, ता. ३० ः संगमेश्वर तालुक्यातील श्री गणेश मंदिर चिखली कानालवाडी येथे गोळवलकर गुरूजी स्मृती ग्रामविकास प्रकल्प आणि डॉ. बाबासाहेब आंबेडकर वैद्यकीय प्रतिष्ठान यांच्यातर्फे सेवांकुर भारत कोकण प्रांत यांनी मोफत आरोग्य तपासणी शिबिर आयोजित केले होते. शिबिराचा लाभ ७३ ग्रामस्थांनी घेतला.
या शिबिराचे उद्‍घाटन माजी पंचायत समिती सभापती प्रेरणा कानाल यांच्या हस्ते पार पडले. या शिबिरात ३२ जणांची रक्तगट तपासणी करण्यात आली. या सर्वांवर मोफत औषधोपचार करण्यात आले. आरोग्य शिबिरासाठी डॉ. मंगेश सातभाई यांच्या मार्गदर्शनाखाली सेवांकुरचे डॉ. हृषिकेश गोरे, डॉ. अथर्व शिरोडकर व इतर १६ प्रशिक्षित डॉक्टरांचे पथक उपस्थित होते. डॉ. सन्मान बेलवलकर व डॉ. नितीन गाडेकर या तज्ज्ञ डॉक्टरांनी शिबिराला भेट घेऊन सहकार्य केले. त्यांच्या मदतीसाठी वालावलकर रुग्णालयाचे डॉ. आर्या कोराणे व डॉ. अनिकेत गायकवाड पथकासह उपस्थित होते. त्यांना प्राथमिक आरोग्य केंद्र कडवईचे सुपरवायझर हेमंत रेवाळे, समुदाय आरोग्य अधिकारी अमोल म्हस्के, बालाजी गुट्टे व महालॅबच्या वैशाली पुरोहित यांचे सहकार्य लाभले. श्री गणेश मंदिर कानालवाडी या मंडळाकडून नेहमीच सामाजिक, शैक्षणिक, सांस्कृतिक व आध्यात्मिक कार्यक्रमांचे आयोजन केले जाते. या वेळी त्यांनी आरोग्य शिबिराचे आयोजन केले.