Shivsena: तटकरेंना निवडून आणण्यासाठी शिंदे गट सज्ज; बैठक पडली पार

Kokan News: सुनील तटकरे यांना निवडून आणण्यासाठी शिवसेना शिंदे गट सज्ज झाला असून आमदार अनिकेत तटकरे यांच्या उपस्थितीत पेणमध्ये बैठक संपन्न झाली. या वेळी युवासेना जिल्हाप्रमुख संजय म्हात्रे, शिवसेना पेण तालुका प्रमुख तुषार मानकवले यांनी मार्गदर्शन केले.

लोकसभेचे रणशिंग फुंकले असून रायगड लोकसभा मतदार संघामधून सुनील तटकरे व अनंत गीते पुन्हा एक एकमेकांविरोधात भिडणार आहेत. सुनील तटकरे यांना निवडून आणण्यासाठी कसून कामाला लागा, असे आदेश अलिबागचे आमदार महेंद्र दळवी यांनी सर्व पदाधिकारी यांना दिले आहेत.

त्यानुसार पेण तालुकाप्रमुख तुषार मानकवले यांनी, शिवसेना कार्यालयात लोकसभा निवडणुकीबाबत नियोजन करण्यासाठी तसेच विचारविनिमय करण्यासाठी तातडीची बैठक घेतली. गावागावांतील मतदारांशी संपर्क साधून तटकरे यांचा पुन्हा निवडून आणण्यासाठी जोरदार प्रयत्न करणार असल्याचा विश्वास त्‍यांनी व्यक्‍त केला.

शिवसेना ही पक्षादेश मानणारी संघटना आहे. तालुक्यात आपली ताकद वाढली आहे. विभागीय बैठका सुरू असून युतीची संयुक्त बैठक लवकरच होणार आहे. आपल्याला आमदारकीचा उमेदवार पाहिजे असेल तर आपली ताकद वाढवयाला पाहिजे.
- संजय म्हात्रे, जिल्हाप्रमुख, शिंदे गट