रायगड रस्त्यावर सहलीच्या बसला अपघात  

माणगाव : पुण्यातील खासगी मिनी बसचालकाचे नियंत्रण सुटल्याने माणगाव तालुक्यातील घरोशी वाडी घाटरस्त्यावर शुक्रवारी (ता. ११) रात्री अपघात झाला. ही बस २० फूट खोल दरीत कोसळली; मात्र सुदैवाने ही बस झाडाला अडकल्याने मोठी दुर्घटना टळली. या अपघातात सात जण जखमी झाले असून चार जणांना पुणे येथील रुग्णालयात दाखल करण्यात आले आहे. या प्रकरणी बसचालकाविरोधात माणगाव पोलिस ठाण्यात गुन्हा दाखल करण्यात आला आहे.

पुणे जिल्ह्यातील निगडी येथील एका शाळेतील काही शिक्षक, पालक आणि विद्यार्थी खासगी मिनी बस क्र. एमएच १४ सीडब्ल्यू ७२५७ ने किल्ले रायगड येथे शुक्रवारी सहलीला आले होते. रायगडवर सहल झाल्यानंतर पुण्याकडे परतीच्या प्रवासादरम्यान माणगाव-रायगड रस्त्यावर दहा किमी अंतरावर घरोशी वाडी घाटरस्त्याच्या तीव्र उतारावर चालकाचे नियंत्रण सुटून मिनीबस २० फूट दरीत कोसळली. संध्याकाळी ७.३० वाजण्याच्या दरम्यान झालेल्या या अपघातात दुर्गा शिंदे (वय ३६), अंजू जगताप (वय ४८), गार्गी कुलदीप भदाने (वय १३), कविता कुलदीप भदाने (वय ३४), हर्षदा टिळेकर (वय ३५), प्रेमाली गुंड (वय ३६) आणि सोनिया सुनील समुद्रे (वय ३०) या जखमी झाल्या आहेत.

या अपघातामध्ये दोघांना गंभीर दुखापत झाली असून त्यांच्यावर माणगावच्या उपजिल्हा रुग्णालयामध्ये उपचार सुरू आहेत. जास्त मार लागलेल्या चौघांना पुणे येथील रुग्णालयात हलवण्यात आले आहे. या प्रकरणी चालक शब्बीर मन्नुदीन लासने (वय ३६, रा. ता. उदगीर, जिल्हा लातूर) याच्याविरोधात गुन्हा दाखल करण्यात आला असून अधिक तपास सुरू आहे, असे सांगण्यात आले.