Ratnagiri : वेश्या व्यवसाय रॅकेटचा पर्दाफाश; पोलिसांच्या हाती लागली 150 जणांची यादी, 2 बडे मोहरे अडकले जाळ्यात

रत्नागिरी : शहरातील वेश्या व्यवसायाच्या रॅकेटची व्याप्ती मोठी असल्याचे तपासात उघड होत आहे. या प्रकरणामध्ये सापडलेल्या डायरीमध्ये १५० जणांची यादी पोलिसांच्या हाती लागली आहे. त्यामध्ये रत्नागिरीतील २ बडे मोहरे सापडले आहेत.

अमली पदार्थ तस्करीमध्येही ते सामील असून, त्यांना अटक केली आहे. काहींचे सीडीआर काढण्यात येणार असून, सीसीटीव्ही फुटेजचीही मदत घेतली जाणार आहे. रत्नागिरी तालुका, जिल्हा आणि बाहेरच्या अनेकांचा यामध्ये समावेश आहे.

सर्वांवर कारवाई करून या अनैतिक व्यवसायाला पायबंद घातला जाईल, अशी माहिती जिल्हा पोलिस अधीक्षक धनंजय कुलकर्णी यांनी दिली. अब्दुल मतीन हसनमियाँ डोंगरकर (३६, रा. बोर्डिंग रोड माळनाका, रत्नागिरी) आणि ओमकार जगदीश बोरकर (चिंचखरी, रत्नागिरी) अशी अटक केलेल्या संशयितांची नावे असल्याचे त्यांनी सांगितले.

शहरातील मध्यवर्ती आणि उच्चभ्रू ठिकाणी एका फ्लॅटमध्ये दोन तरुणींचा वापर करून राजेंद्र रमाकांत चव्हाण वेश्या व्यवसाय चालवत असल्याचे पोलिसांनी टाकलेल्या छाप्यात उघड झाले. त्यानंतर गुन्हे अन्वेषण विभागाच्या पथकाने २० जुलैला दुपारी चव्हाण याला अटक केली. तसेच दोन पीडित महिलांना ताब्यात घेतले. संशयिताला न्यायालयात हजर केले असता पोलिस कोठडीत रवानगी केली.

त्याची कसून चौकशी केल्यावर त्याच्या मोबाईल क्रमांकाच्या सीडीआरवरून त्याच्या या दोन साथीदारांचाही या गुन्ह्यात सहभाग असल्याचे निश्चित झाले. हे तिघेही या व्यतिरिक्त अन्य ठिकाणी वेश्या व्यवसाय चालवत असल्याचे निष्पन्न झाल्यावर आज शहर पोलिसांनी या दोन्ही संशयितांना अटक केली. दरम्यान, राजेंद्र चव्हाणच्या पोलिस कोठडीचीही मुदत मंगळवारी संपली.

त्यामुळे या तिन्ही संशयितांना एकत्रित न्यायालयात हजर केले असता न्यायालयाने त्यांची रवानगी २७ जुलैपर्यंत पोलिस कोठडीत केली. या प्रकरणी शहर पोलिस अधिक तपास करत आहेत. पोलिसांनी हस्तगत केलेल्या डायरीमध्ये १५० जणांची यादी आहे. या यादीत सर्वसामान्य नाहीत तर बडी धेंडे असल्याची माहितीही पुढे येत आहे.