रत्नागिरी : भर दुपारी उमरीला पाणी

संगमेश्वर - मेमध्ये तालुक्यातील उमरे नदीला अचानक पाणी आल्याने ग्रामस्थ भयभीत झाले होते. ग्रामस्थांनी उमरे धरण फुटल्याची भीती व्यक्त केली. अनेकांनी धरणाकडे धाव घेतली. याबाबत माहिती घेता उमरे पाझर तलावाचे दरवाजे कामासाठी उघडल्याने हा प्रकार घडल्याचे उघड झाले. मात्र, याची कोणतीही पूर्वसूचना ग्रामस्थांना दिली नसल्याने तीव्र नाराजी व्यक्त होत आहे. आजच्या प्रकारात सुदैवाने काही अनर्थ घडला नाही. संगमेश्वर तालुक्यातील उमरे नदीत आज दुपारी अनेक महिला कपडे धुण्यासाठी गेल्या होत्या. मुले आंघोळीसाठी नदीत पोहत होती. दुपारी १ वाजण्याच्या सुमारास अचानक नदीचे पाणी गढूळ झाले. काही वेळात नदीत पाण्याचा मोठा लोंढा आला. हा प्रकार पाहून अनेकांनी उमरे धरण फुटल्याची भीती व्यक्त केली. अनेकांनी धरणाकडे धाव घेतली.

संगमेश्वर तालुक्यातील उमरे पाझर तलावाचे दुरुस्तीचे काम गेले महिनाभर सुरू आहे. या तलावाच्या कालव्याचे दोन्ही दरवाजे नादुरुस्त झाल्याने कालव्याला पाणी सोडता येत नव्हते. त्यामुळे येथील शेतकऱ्यांना उन्हाळी पीक घेता येत नव्हते. गतवर्षी हे दरवाजे नवीन बसवण्याचे काम ती घेण्यात आले होते. मात्र ते दरवाजे गेली कित्यक वर्ष बंद असल्याने आणि धरणात पाण साठा जास्त असून पाऊस जवळ आल्याने हे काम स्थगित केले होते. आज दुपारी एकच्या सुमारास फणसवणे भांडार वाडी, कळंबस्ते तेलेवाडीतील काही मुले नदीत आंघोळीला गेली असता अचानक नदीच्या पाण्याची पातळी वाढू लागली. पाणी वाढते आहे हे पाहताच मुलांनी नदीच्या बाहेर येण्याचा प्रयत्न केला. बघता बघता नदी दुथडी वाहू लागली आणि एकच कल्लोळ सुरू झाला. जवळच काही महिला कपडे धुवत होत्या. त्यांनी त्या मुलाना स्वतःला सावरत बाहेर काढण्याचा प्रयत्न केला, त्यांच्या मदतीला तेले वाडीतील नदीकिनारी घर असणारे विनायक पाटील धावले आणि त्यांनी सर्व मुलांना सुखरूप बाहेर काढले म्हणून अनर्थ टळला. यानंतर सर्वांचा जीव भांड्यात पडला. उमरे पाझर तलावाचे काम गेले दोन वर्ष सुरू आहे. गेल्या वर्षी अर्धवट काम झाले. यावर्षी पुढील काम सुरू करण्यात आले. मात्र काम करताना ग्रामस्थांना याची कोणतीही पूर्वसूचना न देण्यात आल्याने तीव्र नाराजी व्यक्त करण्यात येत आहे.