Vaibhavwadi : नाधवडेतील तावडेंना ‘कृषिभूषण’ पुरस्कार

वैभववाडी : प्रवण फार्मर प्रोड्युसर कंपनीच्या माध्यमातून (कै.) विवेकानंद नाईक द्वितीय स्मृतिदिन आणि वैभव कृषिभूषण पुरस्कार वितरण सोहळा येथील आंबेडकर भवनात आयोजित केला होता. यंदाचा वैभव कृषिभूषण पुरस्कार नाधवडे येथील प्रयोगशील शेतकरी राजेश तावडे यांना देण्यात आला.

यावेळी माजी सभापती बाप्पी मांजरेकर, तालुका खरेदी-विक्री संघाचे संचालक प्रमोद रावराणे, आशालता नाईक, विलास देसाई, विठोबा सावंत, महेश रावराणे, मंगेश कदम आदी उपस्थित होते. संघाचे संचालक रावराणे यांनी, मंडळ कृषी अधिकारी नाईक यांनी तालुक्याच्या शेतीक्षेत्रात दिलेले योगदान कधीही विसरता येणार नाही.

त्यांनी कृषी खात्याची प्रतिमा उंचावण्याचे काम केले. आपल्या बारा वर्षाच्या कारर्कीदीत १०० हुन अधिक शेतकरी स्वतःच्या पायावर उभे केले. त्यांचा आदर्श कृषी खात्यातील अधिकाऱ्यांनी घेतला पाहिजे. आर्थिक उन्नतीसाठी शेतकऱ्यांनी संघटित झाले पाहिजे, असे आवाहन केले. शेतकऱ्यांसाठी ऊन, वारा, पाऊस याची कधीच तमा नाईक यांनी बाळगली नाही. त्यांनी उभे केलेले शेतकरी आर्थिक दृष्ट्या सक्षम झाले पाहिजेत.

तीच त्यांना खऱ्या अर्थाने श्रध्दांजली ठरेल, असे श्रीमती नाईक यांनी सांगितले. ‘प्रवण’चे महेश संसारे यांनी भविष्यात तालुक्यातील शेतकऱ्यांनी संघटित होणे गरजेचे आहे. शेती, शेतमाल प्रकिया यावर चर्चा करून उद्योग उभे करायला हवेत. आंबा, काजूवर प्रक्रिया होतेय; परंतु अजूनही कित्येक फळांवर प्रकिया होताना दिसत नाही. त्यासाठी आपण पुढाकार घेतला पाहिजे, असे मार्गदर्शन केले.