वैभववाडी : करूळ घाटात वाहतुकीचा खोळंबा

वैभववाडी : दुरावस्था झालेल्या करूळ घाटातील खड्डे बुजविण्याच्या कामाला राष्ट्रीय महामार्ग प्रधिकरणने सुरूवात केली आहे.या कामात व्यत्यय येऊ नये म्हणुन या मार्गाने सध्या एकेरी वाहतुक सुरू ठेवण्यात आली आहे. त्याचा वाहतुकीवर परिणाम झाला असुन घाटात वाहनांच्या रांगाच रांगा लागल्याचे चित्र सध्या पाहायला मिळत आहे.

करूळ घाटरस्त्याची दुरावस्था झाली आहे.पाच ते सहा फुटाचे खड्डे घाटरस्त्याला पडले असल्यामुळे वाहने कंलडण्याचे प्रमाण वाढले आहे.२७ ऑक्टोंबरपुर्वी या मार्गावरील खड्डे न बुजविल्यास घाटरस्त्यामध्ये २७ ऑक्टोंबरला साखळी उपोषण करण्याचा इशारा तालुक्यातील ऊस उत्पादक शेतकऱ्यांनी प्रशासनाला दिला होता.याशिवाय काही लोकप्रतिनिधीनी देखील या मार्गावरील खड्डे बुजविण्यासाठी राष्ट्रीय महामार्ग प्रधिकरणच्या अधिकाऱ्यांना सुचना केल्या होत्या.त्यानुसार काल ता.२३ पासुन या मार्गावरील खड्डे बुजविण्याचे काम सुरू करण्यात आले.या मार्गावरून मोठ्या प्रमाणात वाहतुक सुरू असल्यामुळे खड्डे भरताना वाहनांचा व्यत्यय निर्माण होत होता.त्यामुळे प्रधिकरणने घाटमार्गातील खड्डे बुजवुन होईपर्यत या मार्गावरून एकेरी वाहतुक सुरू ठेवण्याचा निर्णय घेतला आहे.

त्यामुळे घाटमार्गात कालपासुन वाहतुकीचा खोळंबा निर्माण झाल्याचे चित्र पाहायला मिळत आहे.एका बाजुची वाहने थांबवुन दुसऱ्या बाजुने येणारी वाहने आळीपाळीने सोडली जात आहे.त्यामुळे २५ ते ३० मिनिटांच्या प्रवासांसाठी आता तासभर लागत आहे.घाटमार्गात सध्या वाहनांची मोठी रांग लागल्याचे चित्र पाहायला मिळत आहे.

चौकट- पाच ते सहा दिवस लागण्याची शक्यता

करूळ घाटात फुट दीड फुट खोलीचे आणि पाच ते सहा फुट लांबी रूंदीचे खड्डे पडलेले आहेत.काही ठिकाणी रस्ताच शिल्लक राहीलेला नाही.त्यामुळे दहा किलोमीटर लांबीच्या या घाटमार्गावरील खड्डे बुजविण्यासाठी किमान पाच ते सहा दिवस लागण्याची शक्यता आहे.यासंदर्भात राष्ट्रीय महामार्ग प्रधिकरणच्या शाखा अभियंत्याशी संपर्क साधण्याचा प्रयत्न केला असता तो होवु शकला नाही.