Ratnagiri Crime : खेर्डी रेल्वेट्रॅकवर तुतारी एक्स्प्रेसखाली तरुणाने केली आत्महत्या; पोलिसांना सापडले अर्धेच धड

चिपळूण : शहरालगत असलेल्या खेर्डी रेल्वे पुलाच्याजवळील रेल्वेट्रॅकवर (Railway Tracks) तुतारी एक्स्प्रेसखाली (Tutari Express) एका तरुणाने आत्महत्या केली. त्याचे अर्धे धड रात्री सापडले तर अर्धे अंधारात जंगलात पडल्याने सापडले नव्हते.

दुपारी ४० ते ४५ पोलिस व आरसीपी जवानांनी ते शोधून काढले. हा अपघात मध्यरात्रीनंतर १.१० वाजता घडला. रेल्वे पोलिस अजय ढोक यांनी खबर दिल्यानुसार, मध्यरात्रीनंतर खेर्डी रेल्वेट्रॅकवर मुंबईकडे जाणाऱ्या तुतारी एक्स्प्रेसखाली अक्षय संभाजी मोहिते (२६, रा. कान्हे पिंपळी) याने आत्महत्या केली.

पती-पत्नीत वारंवार वाद होत होते. त्यातूनच त्याने आत्महत्या केली असावी, असा अंदाज आहे. अक्षयच्या मागे आई, पत्नी, सहा महिन्याचे मूल आहे. या प्रकरणी आकस्मिक मृत्यूची नोंद करण्यात आली असून, पोलिस उपनिरीक्षक महाडिक अधिक तपास करत आहेत.