Road Accident : कामावरून घरी परतताना तरुणाचा अपघाती मृत्यू; संकेतच्या डोक्याला गंभीर दुखापत

वेंगुर्ले : मोपा विमानतळ (Mopa Airport) येथून कामावरून घरी परतत असताना झालेल्या दुचाकी अपघातात (Road Accident) सागरतीर्थ न्हैचीआड येथील तरुणाच्या मृत्यू झाला. संकेत किशोर पेडणेकर (वय २५) असे त्याचे नाव आहे. ही घटना शिरोडा-वेंगुर्ले सागरी मार्गावर (Shiroda-Vengurla Sagarimarg) सागरतीर्थ बागकरवडी येथे गुरुवारी (ता. १४) मध्यरात्री घडली.

संकेत मोपा विमानतळावर कामाला होता. तो, गुरुवारी मध्यरात्री साडेबाराच्या सुमारास कामावरून घरी येताना शिरोडा वेंगुर्ला मार्गावर सागरतीर्थ बागकरवाडी येथे त्याची दुचाकी (एमएम ०७एके ६१२०) रस्त्याच्या डाव्या कडेला खाली गेली. तेथील लोखंडी गेट आदळली. याची माहिती मध्यरात्री अडीचच्या दरम्यान तेथून जाणाऱ्या टेम्पो चालकाने वेंगुर्ला पोलिसांना दिली.

गस्तीवरील हेड कॉन्स्टेबल बंड्या धुरी, सहायक उपनिरीक्षक रमेश तावडे व होमगार्ड घाडीगावकर घटनास्थळी दाखल झाले. संकेतच्या डोक्याला गंभीर दुखापत झाली होती. पोलिसांनी त्याला आपल्या वाहनातून शिरोडा उपजिल्हा रुग्णालयात नेले. मात्र, वैद्यकीय अधिकाऱ्यांनी त्याला मृत घोषित केले.

रेडी प्राथमिक आरोग्य केंद्रात शवविच्छेदन झाले. त्यानंतर मृतदेह नातेवाइकांच्या ताब्यात देण्यात आला. संकेतच्या मागे आई, वडील व बहीण असा परिवार आहे. दरम्यान, काही दिवसांपूर्वी मोपा विमानतळावरून कामावरून घरी परतत असताना कळणे करमळीवाडी (दोडामार्ग) येथील तरुणीचा गोवा कासारवर्णे येथे अपघाती जागीच मृत्यू झाला होता. यापाठोपाठ आता ही अशी दुसरी घटना घडली आहे.