अंकित बावणेचे आक्रमक दीड शतक ; महाराष्ट्राला मणिपूरविरुद्ध विजयाची संधी

सोलापूर : अंकित बावणेने यंदाच्या रणजी मोसमात महाराष्ट्राकडून पहिले शतक करण्याचा मान मिळवला. केदार जाधव आणि सिद्धेश वीर यांच्या अर्धशतकाच्या योगदानामुळे महाराष्ट्राने त्रिशतकी धावा करून मणिपूर संघावरचे वर्चस्व दुसऱ्या दिवशी कायम राखले. महाराष्ट्राने पहिल्या डावात १८३ धावांनी आघाडी घेतली आणि आज दुसऱ्या दिवसअखेर मणिपूरची ४ बाद ८५ अशी अवस्था केली. मणिपूरचा संघ अजून ९८ धावांनी पिछाडीवर आहे. त्यामुळे चार दिवसांचा हा सामना उद्या तिसऱ्या दिवशीच जिंकण्याची संधी महाराष्ट्राला मिळाली आहे.

आजच्या दुसऱ्या दिवसाचा खेळ अंकित बावणेसह गोलंदाज हितेश वाळूंज यांनी गाजवला. अंकितने १५३ धावांची खेळी केली, तर पहिल्या डावाच पाच विकेट मिळवणाऱ्या हितेशने तीन फलंदाज बाद केले. आज दुसऱ्या दिवसाचा खेळ सुरू झाला तेव्हा कर्णधार केदार जाधव ४९ धावांवर नाबाद होता. अर्धशतक केल्यानंतर केदार फार काळ टिकला नाही; पण अंकितने मात्र वेगवान दीडशतकी खेळी करून मैदान गाजवले.

१७२ चेंडू तो मैदानात होता. त्यात त्याने १८ चौकार आणि ६ षटकारांची पेरणी केली. दहाव्या क्रमांकाचा फलंदाज हितेश बाद झाला, तेव्हा महाराष्ट्राची ९ बाद २५० अशी स्थिती होती; परंतु अंकितने एका बाजूने आक्रमक फलंदाजी करत महाराष्ट्राची धावसंख्या पटापट वाढवली आणि अखेरचा फलंदाज प्रदीप दाधेसह ७० धावांची भागीदारी केली. यात दाधेचा वाटा केवळ ३ धावांचाच होता.

संक्षिप्त धावफलक ः मणिपूर, पहिला डाव ः १३७ आणि दुसरा डाव ः ४ बाद ८५ (नीतेश सरदेसाई २६, जॉन्सन सिंग २३, हितेश वाळूंज १७-९-२१-३, विकी ओस्तवाल ११-३-३०-१). महाराष्ट्र, पहिला डाव ः ३२० (सिद्धेश वीर ५८, केदार जाधव ५६, अंकित बावणे १५३, विश्वोर्जित कोंथूजाम २३-६-७७-४, एल कृष्णा सिंघा २५-३-११६-३, लंबाम सिंग ९-०-३६-२)