Asia Cup 2022 : दुबईत आजपासून ‘क्रिकेट फेस्टिवल’; श्रीलंका-अफगाणिस्तान भिडणार

Asia Cup 2022 : भारत-पाकिस्तान लढतींमुळे सर्व क्रिकेटविश्वाचे लक्ष लागून राहिलेल्या आशिया कपला टी-20 स्पर्धेस आजपासून सुरुवात होत आहे. ‘यजमान’ श्रीलंका आणि अफगाणिस्तान यांच्या लढतीने स्पर्धेचे बिगूल वाजेल. टी-20 प्रकार असतो तेव्हा अफगाणिस्तान धोकादायक संघ म्हणून समजला जातो. त्यामुळे श्रीलंकेला सावधच रहावे लागणार आहे.

ही स्पर्धा श्रीलंकेत होणार होती; परंतु तेथे मोठी उलथापालथ झाल्यामुळे स्पर्धा अमिरातीत खेळवण्याचा निर्णय घेण्यात आला. ठिकाण बदलले असले, तरी तांत्रिकदृष्ट्या श्रीलंकाच यजमान आहेत. श्रीलंका, अफगाणिस्तान आणि बांगलादेश यांचा ब गटात समावेश आहे. यातील दोनच संघ सुपर- फोरसाठी पात्र ठरणार आहे. त्यामुळे या तिघांसाठी एकमेकांविरुद्धची प्रत्येक लढत महत्त्वाची आहे.

अफगाणिस्तानच्या तुलनेत श्रीलंकन संघ कागदावर जास्त समतोल दिसेल. संघात तरुण खेळाडूंचा समावेश जास्त आहे. कप्तान दसून शनाका स्वतः अष्टपैलू खेळाडू आहे आणि त्याला चरित असालंका आणि धनंजय डिसिल्वाची साथ आहे. राजपाकसेसारखा आक्रमक फलंदाज आयपीएलचा अनुभव पाठीशी घेऊन येतो आहे.

अफगाणिस्तान संघाची ताकद टी-20 क्रिकेटचा ग्लोबल सुपरस्टार राशिद खानमध्ये दडली आहे. संघ वेगवान गोलंदाजांपेक्षा फिरकीवर भरवसा ठेवेल. कारण राशिद खानच्या जोडीला मुजीब आणि अनुभवी मोहम्मद नबी असेल. फलंदाजीला पोषक खेळपट्टीवर चेंडूला हवा देणारे नाही, तर काहीसा वेगाने मारा करणारे फिरकी गोलंदाज प्रभावी ठरू शकतात, असा अंदाज आहे. आमच्या फिरकी गोलंदाजांना फलंदाजांनी साथ द्यायला हवी. नवे प्रशिक्षक जोनाथन ट्रॉट तोच प्रयत्न सरावात करत आहेत. आमचा संघ अगोदर झिम्बाब्वे आणि मग आयर्लंडचा दौरा करून आला असल्याने आमची चांगले टी--20 सामने खेळायची तयारी झाली आहे, असे नजीबुल्ला झद्रानने सांगितले.

सगळ्यांचे लक्ष फक्त भारत वि. पाकिस्तान लढतीकडे लागले असताना आम्ही विमान रडार खालून जाते तसा गपचूप सर्व करून तयार होत आहोत. आमच्या संघात गुणवान खेळाडू कमी नाहीत, असे श्रीलंकन संघाचे प्रशिक्षक ख्रिस सिल्व्हरवूड म्हणाले.

बांगलादेश आणि श्रीलंकापैकी किमान एका सामन्यात मोठी कामगिरी करून विजय मिळवता आला, तर पुढच्या फेरीत जाऊन भारत आणि पाकिस्तानसमोर दोन हात करायची संधी अफगाणिस्तानला असेल.