Asian Games 2023:भारताच्या खिशात आणखी दोन पदकं फिक्स, पुरुष आणि महिला स्क्वॉश संघ सेमी फायनलमध्ये दाखल

Asian Games 2023:सध्या हँगझाऊ या ठिकाणी २०२३च्या आशियाई क्रीडा स्पर्धा खेळवल्या जात आहेत. या स्पर्धेत भारतीय खेळाडूंकडून चांगलं प्रदर्शन करण्यात येतय. भारत पदकांच्या बाबतीत पाचव्या स्थानावर असून आतापर्यंत या स्पर्धेत २४ पदकांची कमाई केली आहे. ज्यामध्ये ६ सुवर्ण, ८ रौप्य आणि १० कांस्य पदाकांचा समावेश आहे. मात्र, भारताच्या खात्यात आणखी पदकं येण्याची शक्यता आहे. भारताच्या पुरुष आणि महिला संघांनी सेमी फायनलमध्ये धडक मारत भारतासाठी दोन पदकं निश्चित केली आहेत.

भारताच्या पुरुष आणि महिला स्क्वॉश संघांनी गुरुवारी सेमी फायनलमध्ये धडक मारली. पुरुष संघाने नेपाळला ३-०ने धूळ चारत आपली सेमी फायनलची जागा निश्चित केली. पुरुष आणि महिला संघांनी आपल्या पूलमध्ये अव्वल स्थान पटकावले आहे. त्यामुळे या दोन्ही संघाचं कांस्य पदक तर निश्चितच झालय.

भारताने आतापर्यंत २०२३च्या आशियाई क्रीडा स्पर्धेत ६ सुवर्ण पदकं जिंकली आहेत. भारताला आणखी सुवर्णपदकं मिळू शकतात. यामध्ये कबड्डी, बॅडमिंटन ,अ‍ॅथलेटिक्स या क्रीडा प्रकारांचा समावेश आहे. यावेळी नीरज चोप्रावर विशेष लक्ष असणार आहे. त्याच्याकडून देखील देशवासीयांना सुवर्ण पदकाची अपेक्षा आहे.