नॉर्थ साऊंड (अँटीग्वा) : तीन वर्षांपूर्वी टी-२० विश्‍वकरंडकाचे जेतेपद पटकावणारा ऑस्ट्रेलियन संघ यंदाच्या प्रतिष्ठेच्या स्पर्धेत उद्या (ता. ११) नामिबिया संघाचा सामना करणार आहे. ओमान व इंग्लंडवर विजय मिळवल्यानंतर आता बलाढ्य ऑस्ट्रेलियन संघ ब गटातील सलग तिसऱ्या लढतीत बाजी मारून ‘सुपर आठ’ फेरीमध्ये प्रवेश करण्यासाठी प्रयत्नांची शिकस्त करताना दिसेल.
ओमान संघावर विजय मिळवणाऱ्या नामिबिया संघाला आपले आव्हान कायम राखण्यासाठी ऑस्ट्रेलियाला पराभूत करावे लागणार आहे. कागदावर तरी या लढतीत ऑस्ट्रेलियाचे पारडे जड आहे, असे म्हटले तरी वावगे ठरणार नाही.
ऑस्ट्रेलियाने सलामीच्या लढतीत ओमान संघावर ३९ धावांनी विजय मिळवला. त्यानंतर गतविजेत्या इंग्लंडला ३६ धावांनी धूळ चारली. आता नामिबियावर मात केल्यास ऑस्ट्रेलियाचा ‘सुपर आठ’ फेरीतील प्रवेश पक्का होईल.
अखेरच्या साखळी फेरीत त्यांना स्कॉटलंडचा सामना करावा लागणार आहे. या गटातून स्कॉटलंडने पाच, तर ऑस्ट्रेलियाने चार गुणांची कमाई केली आहे. त्यामुळे या दोन्ही संघांना आगेकूच करण्याची संधी असणार आहे.
डेव्हिड वॉर्नर व ट्रॅव्हिस हेड ही ऑस्ट्रेलियन सलामी जोडी दमदार फलंदाजी करीत आहेत. इंग्लंडविरुद्धच्या लढतीत दोघांनी केलेल्या झंझावाती फलंदाजीमुळेच ऑस्ट्रेलियाला विजयाची भक्कम पायाभरणी करता आली. ऑस्ट्रेलियन संघात अष्टपैलू खेळाडूंची कमी नाही.
ट्रॅव्हिस हेड, मिचेल मार्श, ग्लेन मॅक्सवेल, मार्कस स्टॉयनिस, पॅट कमिन्स, मिचेल स्टार्क हे सर्व खेळाडू गोलंदाजी तसेच फलंदाजी करू शकतात. त्यामुळे इतर संघांपेक्षा या संघाकडे अनेक पर्याय उपलब्ध आहेत. याचा फायदा त्यांना घेता येऊ शकणार आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.