नवी दिल्ली : भारताच्या पुरुष बॅडमिंटन संघाला गुरुवारी झालेल्या ‘अ’ गटातील साखळी फेरीच्या अखेरच्या लढतीत चीनकडून ३-२ अशा फरकाने हार पत्करावी लागली. भारतीय संघ पराभूत झाला असला तरी त्यांनी चीनला कडवी झुंज दिली. भारताच्या दोन्ही संघांनी (पुरुष व महिला) प्रतिष्ठेच्या स्पर्धेची उपांत्यपूर्व फेरी गाठली असून दोन्ही संघांच्या या लढती उद्या (ता. १६) खेळवण्यात येणार आहेत.
चीनविरुद्धच्या पहिल्या लढतीत एच. एस. प्रणोय याने वेंग हाँग यांग याच्याविरुद्धच्या लढतीत पहिला गेम ६-२१ असा गमावल्यानंतर पुढील दोन गेममध्ये २१-१८, २१-१९ असे यश मिळवले आणि भारतीय संघाला १-० अशी आघाडी मिळवून दिली. दुहेरीच्या लढतीत एम. आर. अर्जुन-ध्रुव कपिला या जोडीला पराभवाचा सामना करावा लागला. चेन यांग व लिऊ यी या जोडीकडून भारतीय जोडीला १५-२१, २१-१९, १९-२१ अशाप्रकारे मात सहन करावी लागली. लक्ष्य सेन याने मात्र एकेरीच्या लढतीत लेई लॅन शी याच्यावर २१-११, २१-१६ असा सहज विजय नोंदवला आणि भारताला २-१ असे पुढे नेले.
भारतीय संघ या लढतीत पुढे असूनही पुढील दोन लढतींमध्ये पराभव झाल्यामुळे चीनकडून हार पत्करावी लागली. सूरज गोआला-पृथ्वी रॉय या जोडीला दुहेरीच्या लढतीत रेन शियान-शी हाओ नॅन यांच्याकडून २१-१३, २१-९ अशा नामुष्कीचा सामना करावा लागला. अखेरच्या लढतीत वँग झेंग याने चिराग सेनला नमवले.
उपांत्यपूर्व फेरीच्या लढती आज रंगणार
भारताचे दोन्ही संघ उपांत्यपूर्व फेरीत पोहोचले आहेत. भारतीय पुरुष तसेच महिला या दोन्ही संघांच्या उपांत्यपूर्व फेरीच्या लढती उद्या होणार आहेत. भारताचा पुरुष संघ ‘अ’ गटातून उपविजेता ठरला. तसेच महिला संघ डब्ल्यू गटातून पहिल्या स्थानावर राहिला. महिला संघासमोर मलेशियाचे आव्हान असणार आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
