क्वालालम्पूर - भारताची ऑलिंपिक पदक विजेती पी. व्ही. सिंधू हिने महिला एकेरीत आणि किदांबी श्रीकांत व एच. एस. प्रणॉय यांनी पुरुष एकेरीत प्रतिस्पर्ध्यांवर विजय मिळवत मलेशिया मास्टर्स सुपर ५०० स्पर्धेच्या उपांत्यपूर्व फेरीत प्रवेश केला. लक्ष्य सेन याचे आव्हान मात्र गुरुवारी संपुष्टात आले.
सहावी सीडेड सिंधू हिने जपानच्या एया ओहोरी हिच्यावर २१-१६, २१-११ असा विजय मिळवला. भारताच्या फुलराणीने ४० मिनिटांमध्ये विजयाला गवसणी घातली. सिंधूने जपानच्या खेळाडूला १३ व्यांदा पराभूत केले हे विशेष. सिंधूसमोर उपांत्यपूर्व फेरीच्या लढतीत चीनच्या यी मान झँग हिचे आव्हान असणार आहे.
प्रणॉयला मात्र चीनच्या ली शि फेंग याच्यावर विजय मिळवण्यासाठी प्रयत्नांची शिकस्त करावी लागली. फेंग याने पहिला गेम २१-१३ असा जिंकत १-० अशी आघाडी घेतली. प्रणॉयने पुढील दोन्ही गेममध्ये वर्चस्व गाजवले. दुसरा गेम त्याने २१-१६ असा खिशात टाकला. अखेरच्या गेममध्ये त्याने २१-११ अशी बाजी मारली. प्रणॉयने ही लढत १ तास व १० मिनिटांमध्ये जिंकली.
पुरुषांच्या एकेरीत भारताच्या आणखी एका खेळाडूने यश मिळवले. श्रीकांतने आठव्या मानांकित कुनलावूत विदीतसर्ण याच्यावर रोमहर्षक विजय साकारला. श्रीकांतने दोन्ही गेममध्ये दबावाखाली खेळ उंचावला आणि विजय संपादन केला. श्रीकांतने दोन्ही गेम प्रत्येकी २१-१९ अशा फरकाने जिंकले हे विशेष.
भारताच्या खेळाडूचा पराभव
भारताच्या तीन खेळाडूंनी एकेरीत आगेकूच केली असतानाच लक्ष्य सेनला मात्र पराभवाचा सामना करावा लागला. एनजी लाँग अँगस याने लक्ष्यवर २१-१४, २१-१९ असा विजय मिळवला. लक्ष्य याला ४८ मिनिटांमध्ये हार पत्करावी लागली. लक्ष्यचा सुमार याही स्पर्धेदरम्यान कायम राहिला.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
