Vinod Kambli : माजी क्रिकेटपटू विनोद कांबळी पुन्हा अडचणीत ; पत्नीला तवा फेकून मारला, गुन्हा दाखल!

Vinod Kambli : भारतीय संघाचा माजी क्रिकेटपटू विनोद कांबळी यानी आपल्याला मारहाण केली, असा आरोप त्याची पत्नी अँड्रियाने केला आहे. या प्रकरणी विनोद कांबळीवर वांद्रे पोलीस स्टेशनमध्ये गुन्हा दाखल करण्यात आला आहे. त्यामुळे विनोद कांबळी पुन्हा एकदा अडचणीत सापडला आहे. 

विनोद कांबळी यांनी तव्याचे हँडल फेकून मारले त्यामुळे इजा झाल्याचे कांबळीच्या पत्नीने तक्रारीत म्हटले आहे. तक्रारीनुसार विनोद दारु पिऊन घरी आला होता. घरात येताच त्याला पत्नीने हटकले. त्यामुळे त्याला राग आला. मग स्वयंपाक घरात जाऊन त्याने तव्याचे हँडल आणले आणि मला फेकून मारले, असा आरोप पत्नीने केला आहे. या प्रकरणी विनोदला अद्याप अटक झालेली नाही. 

यापूर्वी देखील विनोद कांबळीला पोलिसांनी अटक केली होती. क्रिकेटपटू विनोद कांबळी याला दारूच्या नशेत कार चालवताना मुंबई पोलिसांनी अटक केली होती. या कृत्यानंतर त्याने दारु पिऊन गेटवरील चौकीदार आणि त्या सोसायटीत राहणाऱ्या काही लोकांशी वाद घातला होता.  त्यानंतर कांबळीची जामिनावर सुटका करण्यात आली होती. 

विनोद कांबळी हा भारतीय संघाचा महान फलंदाज सचिन तेंडुलकरचा खूप चांगला मित्र आहे. कांबळीने भारतासाठी १७ कसोटी आणि १०४ एकदिवसीय सामने खेळले आहेत. १९९३ ते २००० पर्यंत त्यांनी भारतीय संघाचे प्रतिनिधित्व केले. त्याने कसोटीत ५४.२० च्या सरासरीने १०८४ धावा केल्या, तर एकदिवसीय सामन्यात त्याने ३२.५९ च्या सरासरीने एकूण २४७७ धावा केल्या.