Cheteshwar Pujara : पुजाराला डच्चू देणं हे सकारात्मक पाऊल... माजी प्रशिक्षकांचे सडेतोड वक्तव्य

Chereshwar Pujara Indian Test Team : भारतीय संघ वेस्ट इंडीज दौऱ्यावर आहे. तेथे तो 12 जुलैपासून दोन कसोटी सामन्यांची मालिका खेळणार आहे. या मालिकेसाठी भारतीय संघाची घोषणा आधीच झाली असून या संघात अनेक नव्या खेळाडूंना स्थान देण्यात आले आहे. भारताचा अनुभवी फलंदाज चेतेश्वर पुजाराला या संघातून वगळण्यात आले आहे.

पुजाराला कसोटी संघातून वगळण्यात आल्यानंतर या निर्णयाविरूद्ध अनेक लोकांना टीका केली. मात्र भारताचे माजी प्रशिक्षक लालचंद राजपूत यांना हा निर्णय योग्य वाटला आहे. मात्र त्यांना कसोटी संघात सर्फराज खानला स्थान न देण्याचा निर्णय योग्य वाटला नाही.

लालचंद राजपूत यांनी एएनआयशी बोलताना सांगितले की, 'पुजाराला संघातून वगळणे हे भारतीय निवडसमितीचे एक सकारात्मक पाऊल आहे. कारण आता आपल्याला पुढच्या वर्ल्ड टेस्ट चॅम्पियनशिपची देखील तयारी करायची आहे. आता तुम्हाला युवा खेळाडूंना हळूहळू संघात आणले पाहिजे. तुम्हाला त्यांना ग्रुम करून आंतरराष्ट्रीय क्रिकेटसाठी तयार करायला हवे.'

'मला आशा आहे की आता जास्तीजास्त युवा खेळाडूंना देशाचे प्रतिनिधित्व करण्याची संधी मिळेल. वेस्ट इंडीज दौऱ्यासाठी भारतीय कसोटी संघात ऋतुराज गायकवाड आणि यशस्वी जैसवाल यांना संधी मिळाली आहे. या दोघांनी खूप धावा केल्या आहेत. ते आता संघाची बेंच स्ट्रेंथ स्ट्राँग करत आहेत.'

रणजी ट्रॉफीमध्ये सातत्याने धावा करणाऱ्या सर्फराज खानला वेस्ट इंडीज दौऱ्यावरील कसोटी संघात स्थान मिळाले नाही यावर राजपूत यांनी टीका केली आहे. सर्फराजला त्याच्या फिटनेस आणि खराब वर्तनुकीमुळे संघात स्थान मिळाले नाही अशी चर्चा सुरू आहे.

यावर राजपूत म्हणाले की, जर तो सलग तीन वर्षे सातत्याने धावा करतोय तरी त्याची संघात निवड होत नसेल तर नक्कीत काहीतरी कारण असणार. मला नाही माहिती की काय कारण आहे मात्र त्याला संधी द्यायला हवी.

लालचंद राजपूत यांना 2023 मध्ये होणाऱ्या वर्ल्डकपबाबत बोलताना म्हणाले की, जर वेगवान गोलंदाज जसप्रीत बुमराह स्पर्धा खेळला नाही तर तो भारतीय संघासाठी मोठा सेटबॅक असेल. भारताला मायदेशात खेळण्याचा नक्कीत फायदा होईल.

(Sports Latest News)